रौतहटको गौरमा २७ जनाको मृत्यु र ५२ जना घाइते भएको घटनाका पीडित तथा पीडितका परिवारले घटना भएको १३ वर्ष पूरा हुँदासमेत न्याय पाउन सकेका छैनन् ।
गौर नगरपालिका–५ स्थित राइस मिलको चौरमा ०६३ चैत ७ गते मधेसी जनअधिकार फोरम र माओवादी सम्बद्ध मधेसी राष्ट्रिय मुक्ति मोर्चाको आमसभाका क्रममा झडप हुँदा मधेसी जनअधिकार फोरमका समर्थकले माओवादीका कार्यकर्तालाई कुटपिट गर्दा ५ जना महिलासहित २७ जनाको मृत्यु भएको थियो ।
मृत्यु हुनेहरूमा रौतहट पोठियाही गाविसका वाइसिएल इलाका संयोजक रामाकान्त जयसवाल, सरमुजवा गाविसका एसिएम नर्र्मधेश्वर उपाध्याय, चन्द्रनिगाहपुर गाविस–१ की २० वर्षीया सरस्वती उपे्रतीलगायतका थिए ।
आमसभास्थलमा ६, गौर नगरपालिका क्षेत्रभन्दा बाहिर हजममिनिया गाविसमा ११, मुडवलवा गाविस जाने बाटोमा दुई, लक्ष्मीपुर बेलविछुवा गाविसमा दुई जना गरी जम्मा २१ ओटा लास फेला परेका थिए । उपचारको क्रममा गौर अस्पतालमा चार र भरतपुर लैजाँदै गर्दा बाटोमा दुई गरी जम्मा २७ जनाको मृत्यु भएको थियो ।
गौर नगरपालिका–९ बरेवा चोकमा ११–१२ जनालाई मधेशी जनअधिकार फोरमका कार्यकर्ताहरूले कुटपिट गरी एकै ठाउँमा जम्मा पारेर मट्टीतेल खन्याई सलाई खोज्दै गरेको अवस्थामा प्रहरीले हवाई फायर गर्दै उद्धार गरेको थियो ।
घटनामा संलग्न व्यक्ति अहिलेसम्म नै कारबाहीको दायरामा नआउँदा मानव अधिकार समुदाय र पीडित तथा पीडितका आफन्तले सरकारप्रति औँला तेस्र्याएका छन् ।
घटना भएको १३ वर्ष पूरा हुँदासमेत पनि पीडितले न्याय नपाउँदा दण्डहीनता कायमै रहेको भनी मानव अधिकारकर्मीहरूले विभिन्न मञ्चबाट सरकार तथा अन्य सरोकारवालाहरूको ध्यानाकर्षण गराउँदै आएका छन् ।