चीनको ताक्लाकोटबाट भागेर हुम्ला आएका सिमकोट गाउँपालिका–३ का २७ वर्षीय धर्माज्ञाल्जन लामालाई कोरोना भाइरस भएको आशंकामा स्थानीयले उपचारमा अवरोध गरेको पीडित पक्षले आरोप लगाएका छन् ।
हुम्ला पुगेका लामालाई कोरोना भाइरस लागेको आशंकामा स्थानीयले अवरोध गरेपछि उपचारमा समस्या भएको हो । ०७६ फागुन १७ गते चीनको ताक्लाकोट हुँदै हुम्लाको नाम्खा गाउँपालिका–५ को हिल्साबाट ५ हजार मिटर अग्लो नारालेकको हिउँ छिचोल्दै आएका लामालाई प्रहरीले स्वास्थ्य चौकीमा उपचार गर्न लैजादा स्थानीयले विरोध गरेका थिए ।
नारालेखको हिउँबाट धेरै दुःखगरी हुम्ला पुगेका लामाको खुट्टा र शरीर सुनिएर निलडाम भएपछि उनलाई मुचु स्वास्थ्य चौकीमा उपचार गर्न लैजादा स्थानीयले उपचार गर्न नदिएको आफन्त याङजोर लामाले गुनासो गर्नु भयो ।
हिड्न समेत नसकेका घाइते लामाको उपचार गर्न नदिएपछि उहाँको उपचारमा समस्या भएको हो ।
जिल्ला प्रहरी कार्यालय हुम्लाका डिएसपी रामप्रसाद घर्तीमगरले ताक्लाकोटबाट भागेर आएका नेपालीलाई प्रहरीको निगरानीमा रहेको बताउनु भयो । घर्तीमगरलाई नाम्खा गाउँपालिका–५ मुचुको स्वास्थ्य चौकीमा नपु¥याई बाटोमा विना उपकरण उपचार भइरहेको डिएसपी घर्तीमगरले जानकारी दिनु भयो ।
ताक्लाकोटबाट भागेर आएका लामालाई खोज्न चीनका प्रहरी हिल्सासम्म आएको भएपनि लामालाई नभेटेपछि फिर्ता भएको डिएसपी घर्तीमगरले जनाउनु भयो ।
डिएसपी घर्तीमगरका अनुसार नारालेकको बाक्लो हिमपातमा हिडेर आएका कारण शरीर र अनुहार पुरै हिउँले खाएर निलो भएको बताउनु भएको छ । उहाँलाई वडा नम्बर ५ कै यारी क्षेत्रका प्रहरीले घाइते अवस्थामा भेटाएका थिए । घाइते अवस्थामा भेटिएका लामालाई प्रहरीले ल्याएर मुचु स्वास्थ्य चौकीमा उपचार गर्न खोज्दा कोरोना भाइरसको आशंकामा स्थानीयले विरोध गरे ।
यद्यपि अहिले एक जना स्वास्थ्यकर्मीलाई उपस्थिति गराएर उपचार सुरु गरिएको छ । मास्क, उपकरण र औषधि विना उहाँको उपचार गर्ने काम भइरहेको छ ।
जिल्ला प्रहरी कार्यालयका डिएसपी घर्तीमगरका अनुसार कोरोनाको आशंकाले स्थानीय त्रसित छन् ।
लामाका आफन्तले स्थानीय प्रहरी प्रशासनसमक्ष लामाको उद्धारका लागि गृह मन्त्रालयलाई हेलिकप्टरको व्यवस्था गर्न अनुरोध गर्दा सुनुवाई नभएको आरोप लगाएका छन् । हेलिकप्टरको व्यवस्था गरेर राज्यले क्वारेन्टाइनमा राखेर उपचार गर्न आफन्तले माग गरेका छन् । उहाँलगायत अन्य २५ जना नेपाली गत जेठ असारदेखि ताक्लाकोटमा काम गर्दै आएका थिए ।