बुटवल उपमनपा–११ तल्लो देवीनगरका ई– रिक्सा चालक ४४ वर्षीय भुवनसिंह सिंजालीलाई माघ २५ गते प्रहरीले कुटपिट गरेको छ ।
ब्लुबुकको विषयमा विवाद हुँदा सिंजालीलाई बुटवल उपमहानपा– ९ कालिकानगरबाट गिरफ्तार गरेर प्रहरी विटमा ल्याएर प्रहरी जवानद्धय हिमबहादुर बुढा, पुष्कर शाह र प्रदेश ५ ट्राफिक प्रहरी कार्यालय बुटवलका प्रहरी जवान बिपी चन्द्र जिसीले कुटपिट गरेको पीडितले बताउनु भयो ।
रिक्सा चलाइरहेको समयमा ट्राफिक प्रहरीले ब्लुबुक मागेको र ब्लुबुक घरमै छुटेको र लाइसेन्स छ भन्दा चाँवी खोसेको पीडितले बताउनु भयो । कुटपिटबाट सिंजालीको दायाँ तिघ्रामा निलाडाम भएको छ । पीडितले यताउता फर्कन नसक्ने र स्वास फेर्न गाह्रो भएको बताउनु भयो । उहाँको लुम्बिनी प्रादेशिक अस्पताल, बुटवलमा उपचार भइरहेको छ ।
चिकित्सकका अनुसार सिंजालीको छातीमा समस्या देखिएकोले अझै केही दिन भर्ना गरेर उपचार गर्नु पर्छ । घटनाका सम्बन्धमा नेपाल यातायात स्वतन्त्र मजदुर सङ्गठन रुपन्देही, ई–रिक्सा चालक समितिले पीडितको उपचार र दोषीलाई कारवाहीको माग गरेका छन् ।
इलाका प्रहरी कार्यालय बुटवलका डिएसपी भीमलाल भट्टराईले घटनाका विषयमा अनुसन्धान भइरहेको बताउनु भयो ।
