२१ वर्षीया महिलालाई बलात्कार गरेको आरोपमा भक्तपुर जिल्ला सूर्यविनायक नगरपालिका–१ का ४९ वर्षीय राजकुमार खिउजु विरूद्ध ०७६ माघ २२ गते महानगरीय प्रहरी परिसर ललितपुर, जावलाखेलमा उजुरी दर्ता भएको छ ।
नेपाल प्रहरीबाट डेढ महिना अघि स्वैच्छिक अवकास लिएका डिएसपी खिउजुले ०७५ माघ ३० गतेदेखि ०७६ जेठसम्म पटक पटक बलात्कार गरेको पीडितको आरोप छ । आरोपितले पीडितलाई प्रहरी रिपोर्ट बनाउन सहयोग गर्ने बहानामा कार्यकक्षमै बलात्कार गरेको र त्यसपछि पटक पटक बलात्कार गरेको उजुरीमा उल्लेख छ । उजुरीमा खिउजूकी पत्नी र छोरीसमेत मिलेर पीडितलाई धम्की र प्रलोभन दिएको समेत उल्लेख गरिएको महानगरीय प्रहरी परिसर जावलाखेलले जनाएको छ ।
पूर्व डिएसपी खिउजूमाथि माघ २३ गते ललितपुर जिल्ला अदालतबाट पक्राउ पुर्जी लिएको र खोजी कार्य सुरु गरिएको महानगरिय प्रहरी परिसर ललितपुरका एसएसपी टेकप्रसाद राईले बताउनु भयो ।
पीडित महिलाको स्वास्थ्य परीक्षण माघ २२ गते नै पाटन अस्पताल ललितपुरमा गरिएको अस्पतालले जनाएको छ ।