२९ वर्षीया महिला अनुयायीलाई बलात्कार गरेको आरोपमा जिल्ला अदालत सुनसरीबाट धरौटीमा रिहा भएका सिद्धबाबा कृष्णदासजी महाराज भनिने कृष्णबहादुर गिरीलाई थुनामा राखेर मुद्दाको पुर्पक्ष गर्न उच्च अदालत विराटनगरले माघ ९ गते आदेश दिएको छ ।
जिल्ला अदालत सुनसरीका न्यायाधीश राधाकृष्ण उप्रेतीको इजलासले पुस १४ गते तीन लाख रूपियाँ धरौटी लिएर छाड्न दिएको आदेश बदर गर्दै उच्चले जवरजस्ती करणी मुद्दामा थुनामा राख्न आदेश दिएको हो ।
उच्चका मुख्य न्यायाधीश तिलप्रसाद श्रेष्ठ र प्रेमराज कार्कीको संयुक्त इजलासले सुनसरी जिल्ला अदालतको आदेश बदर गरिदिएको हो । उक्त आदेश विरूद्ध सरकारी वकिलको कार्यालयले उच्च अदालत विराटनगरमा निवेदन दायर गरेका थिए । आरोपित सिद्धबाबाले पनि साधारण तारेखमा मुद्दाको पुर्पक्ष माग गर्दै निवेदन दायर गरेका थिए ।
उच्च अदालतबाट जिल्लाको आदेश बदर गरी सिद्धबाबालाई थुनामै राखेर मुद्दाको पुर्पक्ष गर्न आदेश भएको उच्च अदालत विराटनगरका रजिष्ट्रार जितेन्द्रबाबु थपलियाले जानकारी दिनुभयो । उच्चको आदेशपछि जिल्लाले दिएको आदेश बदर भएको उहाँले बताउनुभयो ।
दीक्षा दिने भन्दै मध्यरातमा बोलाएर सुनसरीको चतराधामस्थित आफ्नै आश्रममा कात्तिक ४ गते बलात्कार गरेको किटानी जाहेरी एक महिला अनुयायीले दिएपछि सिद्धबाबालाई मङ्सिर १६ गते गिरफ्तार गरेर सुनसरी प्रहरीले जवरजस्ती करणी मुद्दामा अनुसन्धान थालेको थियो ।
जिल्ला प्रहरी कार्यालयमा मङ्सिर ८ गते हुलाकमार्फत् आएको जाहेरी दर्ता भएपछि बिरामी भएको भन्दै सिद्धबाबा मङ्सिर १२ गतेबाट विराटनगर अस्पताल एवम् विराट नर्सिङ होममा भर्ना भएका थिए ।
उपचारका क्रममा ३८ दिनसम्म अस्पतालमा रहेका उनले अनुसन्धान अवधिमा अस्पतालमै गुजारेपछि प्रहरी हिरासत बस्नु परेको थिएन ।
आफू विरूद्ध प्रहरीले उजुरी दर्ता गरेको थाहा पाएपछि छाती, मुुटु, प्रोस्टेट र पत्थरीको समस्या देखाउँदै सिद्धबाबा अस्पताल भर्ना भएका थिए ।
प्रहरीले मङ्सिर १६ गते आईसीयूदेखि नै गिरफ्तार गरेर अदालतबाट म्याद थप गर्दै घटनाको अनुसन्धान अघि बढाएको थियो । उनलाई अस्पतालका बरिष्ठ मुटु रोग विशेषज्ञ डा. ज्ञानेन्द्र गिरीले ‘माइनर हटअट्याक’ भएको बताउँदै उपचार गरेका थिए ।
अस्पतालबाट पुस २० गते डिस्चार्ज भएपछि कृष्णबहादुर सिधै चतरास्थित आफ्नो आश्रममै पुगेका थिए ।