१२ वर्षीया बालिकालाई बलात्कार गरेको कसुरमा शिवसताक्षी नगरपालिका– ७ शिवगञ्जका ५८ वर्षीय यामबहादुर कोइरालालाई अदालतले पुस २० गते १४ वर्ष कैद सजायको फैसला गरेको छ ।
न्यायधीश प्रमेश पोखरेलको इजलासले कैद सजायसँगै कसुरदारबाट पीडितले पाउने गरी २५ हजार रूपियाँ क्षतिपूर्ति भराउन आदेश भएको छ ।
आरोपितले ०७५ पुस १३ गते बलात्कार गरेको आरोपमा पीडितका बाबुले पुस १७ गते आरोपित विरूद्घ इलाका प्रहरी कार्यालय झिलझिलेमा उजुरी दिएका थिए ।
आरोपितलाई प्रहरीले पुस १७ गते गिरफ्तार गरी कारबाही अघि बढाएकोमा जिल्ला अदालतको ०७५ माघ १० को आदेशमा आरोपित पुर्पक्षका लागि थुनामा थिए ।
पीडित बालिकाको स्वास्थ्य परीक्षण मेची अञ्चल अस्पतालमा ०७५ पुस १७ गते गरिएको थियो ।