महिला हिंसा विरूद्वको १६ दिने अभियान चलिरहेकै बेला साँफेबगर नगरपालिका–३ सिद्धेश्वरकी २१ वर्षीया पार्वती बुढा रावतको शव मङसिर १६ गते बिहान छाउपडी गोठमा फेला परेको छ ।
महिनावारी भएको चौथो दिन मङ्सिर १५ गते खाना खाएर छाउपडी गोठमा सुत्न गएकी पार्वतीको शव भोलिपल्ट बिहान मृत अवस्थामा भेटिएको मृतकका जेठाजु छत्र रावतले जानकारी दिनुभयो ।
घरभन्दा करिब १ सय मिटर टाढा रहेको सात फिट लामो, आठ फिट चौडाइ र ६ फिट उचाइ भएको छाउ घरमा मृत अवस्थामा पार्वतीको शव भेटिएको घटनास्थल पुग्नु भएका इलाका प्रहरी कार्यालय साँफेबगरका इन्स्पेक्टर नरपती भट्टले जानकारी दिनुभयो ।
उहाँले भन्नु भयो–‘होचो र सानो गोठमा आगो बालेको देखियो । प्रारम्भिक रूपमा हेर्दा निसास्सिएरै मृत्यु भएको हुनसक्छ । बिहान सात बजेसम्म नउठेपछि ढोका फोरेर हेर्न जाँदा मृत अवस्थामा भेटिएको आफन्तले बताएका छन् ।’
मृतकको शव पोष्टमार्टमका लागि सदरमुकास्थित जिल्ला अस्पतालमा ल्याइएको प्रहरीले जनाएको छ ।
१ वर्ष ६ महिनाअघि विवाह भएको पार्वतीका पति रोजगारीको सिलसिलामा भारतमा हुनुहुन्छ ।
साविकको सिद्धेश्वर गाविस छाउपडी गोठ मुक्त घोषणा गरिएको थियो । अछाम जिल्लामा सन् २००७ यता मात्र १४ जना भन्दा बढीको मृत्यु छाउपडी गोठमा भएको तथ्याङ्क रहेको छ ।
