आमाछोदिङमो गाउँपालिका–३ गत्लाङका १९ वर्षीय आशिष तामाङलाई गोसाइकुण्ड गाउँपालिका–२ टिमुरेमा गत भदौ १७ गते दिउँसो ४ः३० बजे टिमुरे प्रहरी चौकीका असई डिल्लीबहादुर श्रेष्ठ र प्रहरी हवल्दार रामबहादुर स्याङ्तानले कुटपिट तथा दुर्व्यवहार गरेको घटनाको प्रतिवेदन डेढ महिनासम्म पनि सार्वजनिक भएको छैन ।
पीडितका बाबु पेम्पा तामाङले घटनाको बारेमा आफूहरूसँग बयान लिएपनि झण्डै दुई महिना बित्दा समेत कुनै सूचना नपाएको बताए ।
ना ६ ख ४९२५ नम्बरको कन्टेनर रोकेर चालक खाजा खान भएको बेला गाडीमा आराम गरिरहेका कन्टेनरका धनीसमेत रहेका तामाङ चीनको केरुङ घुम्न जान लागेका थिए ।
‘रोकेको अवस्थामा रहेको कन्टेनरमा यो कस्को गाडी ? किन गलत ठाउँमा पार्किङ गरेको ?’ भन्दै प्रहरीले सोधेपछि कक्षा १२ मा अध्ययनरत युवा तामाङले मेरो भन्ने बित्तिकै प्रहरीले अपशब्दले गाली गरेर अन्धाधुन्ध कुटपिट गरेका थिए । ‘त्यसबेला आफ्नो कुरा राख्न पाइएन ।’–तामाङले भने ।
‘घटनामा संलग्न प्रहरीहरूलाई गिरफ्तार गरी अनुसन्धान सुरू गरिएको र आवश्यक अनुसन्धान पछि विभागीय कारबाही हुने भने पनि के कारबाही भएको भन्ने कुरा सार्वजनिक भएन ।’–जिल्ला प्रहरी कार्यालयका डिएसपी भाग्येन्द्रपुरुष ढकालले बताए ।
घटनाको भोलिपल्ट बिहानै घटनास्थल पुगेर प्रमुख जिल्ला अधिकारी अर्जुन भण्डारी समेत सुरक्षा अधिकारीहरूले आठ बुँदे सहमति गरी छानबिन समितिको गठन गरेको थियो ।
समितिका संयोजकमा महान्यायाधिवक्ताको कार्यालयका उप–न्यायाधिवक्ता चन्द्रकुमार पोखरेल तोकिएका थिए ।
समितिमा जिल्ला समन्वय समिति रसुवाका योजना, अनुगमन तथा प्रशासकीय अधिकृत डा.थानेश्वर भुसाल, गोसाइँकुण्ड गाउँपालिका–२ का वडाध्यक्ष दावादोर्जे तामाङ र व्यवसायी प्रतिनिधि कामीनूर्पु तामाङ सदस्य रहेका थिए ।
‘निर्दोष छोरामाथि टिमुरेमा अपशब्दले गाली गरी सडकमै लाछारपछार गरी निर्घात कुटपिट भएको घटनाको छानविन भएन ।’–पीडितले बाबु पेम्पा तामाङले भने ।
प्रहरीले अमानवीय तवरले लछारपछार गर्दै कुटपिट गरेको भिडियो सामाजिक सञ्जालमार्फत सार्वजनिक भएको थियो ।