सार्वजानिक यातायातमा ज्येष्ठ नागरिकले छुट पाउने व्यवस्था भए पनि खोटाङका ज्येष्ठ नागरिकहरूले सार्वजनिक यातायातमा सहुलियत नपाएको गुनासो गरेका छन् ।
सार्वजानिक यातायातका साधन प्रयोग गर्दा जिल्लाका ज्येष्ठ नागरिकहरूले अझै पनि छुट पाउन नसकेको ज्येष्ठ नागरिक समाजका अध्यक्ष दुर्गाप्रसाद घिमिरे बताए ।
सहुलियत नपाएको विषयमा जिल्ला प्रशासन लगायत सम्बन्धित निकायमा पटकपटक कुरा उठाउँदा समेत अझै छुट पाउन नसकेको समाजका अध्यक्ष घिमिरेको भनाई छ ।
खोटाङ यातायात प्रालिका काउण्टर इञ्चार्ज धनिराम राईका अनुसार एउटा बसमा एक जना ज्येष्ठ नागरिकका लागि भने छुटको व्यवस्था गर्न सकिने छ ।
कतिपय ज्येष्ठ नागरिकलाई सो व्यवस्थाबारे जानकारी नहुँँदा पनि सुविधावाट वञ्चित हुनुपरेको जनाइएको छ ।
ज्येष्ठ नागरिक कल्याण ऐन अनुसार सार्वजनिक यातायातमा ५० प्रतिशत छुट सुविधाको व्यावस्था छ ।
यसैबीच, यात्रुबाट बढी भाडा लिएको आरोपमा हुर्लुङस्थित खोटाङ यातायात प्रालिको काउण्टरबाट दिक्तेल रूपाकोट मझुवागढी नगरपालिका–१३ नुनथलाका २७ वर्षीय तेञ्जी शेर्पा र ३० वर्षीय फुर्वा शेर्पालाई असोज २७ गते गिरफ्तार गरी सोही दिन मुद्दा दायर गरिएको छ ।
खोटाङबाट काठमाडौँ जाने यात्रुबाट जनही १ हजार ४ सय ५० रुपियाँ लिनुपर्नेमा २ हजार लिएको गुनासो आएपछि प्रहरी आफैँ यात्रु भएर जाँदा कालोबजारी गरेको पुष्टि भएपछि उनीहरूलाई गिरफ्तार गरी सोही दिन मुद्दा दर्ता गरिएको हो ।
उनीहरूलाई १० दिनको म्याद थप गरेर कारबाही अगाडि बढाइएको जिल्ला प्रहरी कार्यालयका डिएसपी वामदेव गौतमले बताए ।
कालोबजारी आरोपमा एक वर्षसम्म कैद तथा रू १० लाख रुपियाँसम्म जरिबाना गर्न सकिने कानुनी प्रावधान छ । उनीहरूलाई जिल्ला प्रशासन कार्यालयमा मुद्दा दर्ता गरिएको हो ।