सुत्केरीको शल्यक्रिया गर्ने तयारी हुँदा श्राद्धका कारण चिकित्सकले सुई लगाउन नमान्दा जिल्ला अस्पताल बैतडीमा भर्ना भएकी एक गर्भवति महिलालाई जिल्ला बाहिर रेफर गरिएको छ ।
सुत्केरी व्यथा लागेर असोज १ गते जिल्ला अस्पताल बैतडीमा भर्ना भएकी दशरथचन्द नगरपालिका–४ की २५ वर्षीया कलावती जोशीको चिकित्सकले सुई लगाउन नमान्दा शल्यक्रिया हुन नसकेपछि डडेल्धुरा रेफर गरिएको जिल्ला अस्पताल बैतडीका डाक्टर देवेन्द्र लेखकले बताए ।
डाक्टर लेखकले भने–‘सुत्केरी कलावती जोशी असोज १ गते भर्ना हुनु भएको हो । उहाँ आफै सुत्केरी हुने अवस्था नभएपछि असोज ३ गते शल्यक्रियाको तयारी थियो । शल्यक्रियाअघि सुई लगाउने एनेस्थेसिया चिकित्सक खेमराज भट्टले असोज ४ गते घरमा बुबाको श्राद्ध परेकोले सुत्केरीलाई सुई लगाउन सक्दिन भन्नुभयो । धेरै कर गर्ने कुरा पनि भएन । त्यसपछि उनलाई डडेल्धुरा रेफर गरेका हौँ ।’
रेफर गरिएकी सुत्केरीले एम्बुलेन्स समेत नपाउँदा निजी जिप महङ्गो शुल्कमा भाडामा खोज्नु परेको सुत्केरीका आफन्त नारायण जोशीले बताए ।
जिल्ला अस्पताल बैतडीको एम्बुलेन्स बिग्रेकाले मर्मत भइरहेको जिल्ला अस्पताल बैतडीका डक्टर देवन्द्र लेखकले बताए ।
यो विषयमा जिल्ला अस्पताल बैतडीका एनेस्थेशिया खेमराज भट्टले भने–‘सुत्केरी नछुने मान्यता होइन । असोज ४ गते घरमा बुबाको श्राद्ध परेकोले घर जानु पर्ने हुँदा सुई नलगाएको हो ।’
भट्टले भने–‘बिरामीलाई सुई लगाएर घर जान मिलेन । कुनै समस्या परे अस्पतालमै बस्नु पर्ने भएकाले सुई नलगाएको हुँ । सुत्केरी नछुने मान्यता होइन । मैले तुरुन्तै घर जानु परेकोले डाक्टरले बिरामीलाई रेफर गरेका हुन् ।’
रेफरको भएको विषयमा बैतडीका प्रमुख जिल्ला अधिकारीले गम्भीर चासो लिएको बताएका छन् । प्रमुख जिल्ला अधिकारी आनन्द पौडेलले भने–‘स्वास्थ्यकर्मीको घरमा बुबाको श्राद्ध परेकाले सुई नलगाएको विषयम मैले गम्भीर चासो लिएर बुझ्दा डाक्टर र ऐनेस्थेशियाबिच केही मनमुटाव पनि रहेछ । जुनसुकै कारणले पनि एउटा सुत्केरीले जिल्लामै पाउने सेवा नपाएको विषयमा आवश्यक जाँचबुझ गर्छु ।’
समाजमा भएका यस्ता गलत मान्यता र प्रथा अन्त्य गर्न सबै जागरुक बन्नु पर्ने प्रजिअ पौडेलले बताए ।
चिकित्सकले घरमा श्राद्ध परेको भन्दै सुत्केरीलाई सुई नलगाउँदा जिल्लामा पाउने सेवा नपाएकाले जिल्ला बाहिर जानुपर्दा हजारौँ रुपियाँ खर्च भएको र अनावश्यक दुःख व्यहोर्नु परेको बिरामीका आफन्तले बताएका छन् ।
०७६ भदौ २९ गते मात्रै बैतडीको शिवनाथ गाउँपालिका–१ गाउँसल्लामा सुत्केरी व्यथा लागेकी २१ वर्षीया गौमती चाँडको १२ घण्टासम्म लगातार रगत बग्दा समेत कतै नलगिँदा मृत्यु भएको थियो ।