नेत्र विक्रम चन्द (विप्लव) नेतृत्वको नेपाल कम्युनिष्ट पार्टी निकट बुद्धिजिवी सङ्गठन भेरी कर्णाली इञ्चार्ज ३१ वर्षीय धनराज शाहीलाई प्रहरीले इन्सेकको रोहवरमा वैशाख २४ गते रिहा गरेको छ ।
तिलागुफा नपा–६ का शाहीलाई जिल्ला प्रहरी कार्यालयबाट इन्सेकको रोहवर तथा पत्रकार दिलिपकुमार शाहीको जिम्मामा छाडिएको जिल्ला प्रहरी कार्यालयका डिएसपी विनोद शर्माले बताए ।
विप्लव नेतृत्वको नेकपामा लागेको आरोपमा प्रहरीले शाहीलाई ०७५ चैत २९ गते गिरफ्तार गरेको थियो । जिल्ला अदालत कालिकोटले शाहीलाई वैशाख ८ गते धरौटीमा रिहा गरेपनि प्रहरीले पुनः सोही दिन सार्वजनिक मुद्दामा गिरफ्तार गरी हिरासतमा राखेको थियो ।
वैशाख २३ गते जिल्ला प्रशासन कार्यालय, कालिकोटले २ हजार रुपियाँ धरौटी तथा दैनिक तारेखमा रिहा गर्ने भनी गरेको फैसलापछि प्रहरीले शाहीलाई इन्सेकको रोहवरमा रिहा गरेको जनाएको छ ।