पहिरोका कारण सडक अवरूद्ध हुँदा जिल्लाको जोरपोखरी–एकतिन–मेमेङ सडक खण्डमा एम्बुलेन्सलगायतका सवारी साधन आवतजावतमा समस्या भएको छ । एम्बुलेन्सलगायतका सवारीसाधन सञ्चालनमा समस्या हुँदा बिरामीले सास्ती खेप्नु परेको छ ।
फालेलुङ गाउँपालिका–२ एकतिनस्थित जोरपोखरी–एकतिन–मेमेङ सडक खण्डमा पहिरो गएका कारण सडक पूर्ण रूपमा अवरुद्ध भएको छ ।
निरन्तर पहिरो झरिरहेकाले सडकमा सवारीसाधन सञ्चालन हुन सकेका छैनन् । पञ्चमुखी बजार नजिकै बरडाँडा भन्ने स्थानमा सडकभन्दा करिब १ सय मिटर माथिबाट ठूलो पहिरो खसेपछि सडक पुरिएको छ ।
पहिरोका कारण गाउँपालिकाको केन्द्र थकेपुङ, वडा नम्बर ४ मेमेङ तथा वडा नम्बर ३ माङलेवुङ क्षेत्रबाट सदरमुकाम फिदिमतर्फ आउने–जाने सवारीसाधन, औषधि वोकको गाडी र दैनिक उपभोग्य सामग्री ढुवानी पूर्ण रूपमा ठप्प भएको छ ।
फालेलुङ गाउँपालिका–२ का वडाध्यक्ष तिलबहादुर खत्रीले पहिरोले सडक बन्द हुँदा एम्बुलेन्स, स्कूलका गाडी सञ्चालनमा समस्या भएको बताउनु भयो । कृषि जमिन तथा नगदेबालीमा समेत क्षति पहिरोले क्षति पुर्याएको छ ।
बङ्गालको खाडी हुँदै ०८३ असार ५ गते कोशी प्रदेश भित्रिएको मनसुन अहिले पूर्वी नेपालको हिमाली र पहाडी जिल्लामा बढी सक्रिय भएको छ । जसका कारण निरन्तरको भारी वर्षाका कारण बाढीपहिरोको जोखिम बढेको छ ।