ललितपुरको नख्खुस्थित एनसेल प्रालिको गेटमा विष्फोट हुँदा घाइते भएका सिङ्गप्रसाद गुरुङको उपचारको क्रममा मृत्यु भएको इन्सेक ललितपुर जिल्ला प्रतिनिधि दिपकप्रसाद घिमिरेले जनाएका छन् ।
लमजुङ् जिल्ला साविक गिलुङ् गाविस स्थायी ठेगाना भएका ३९ वर्षीय गुरुङको मेडिसिटी अस्पतालमा उपचारको क्रममा मृत्यु भएको महानगरीय प्रहरी परिसर ललितपुरले जनाएको छ ।
गुरुङलाई सुरूमा अल्का अस्पतालमा उपचार गरिए पनि पछि मेडिसिटी अस्पतालमा लगिएको थियो । गुरुङको मृत्यु फागुन ११ गते बिहानै भएको अस्पतालले जनाएको छ ।
फागुन १० गते राति अज्ञात पक्षले बम विष्फोट गराउँदा गुरुङसहित ललितपुर महानगरपालिका–४ बागडोलकी २६ वर्षीया प्रतिक्षा खड्का र काभ्रे जिल्ला बनेपा नगरपालिकाकी २५ वर्षीया उरुषा मानन्धर घाइते भएका थिए ।
उरुषा र प्रतिक्षाको उपचार मेडिसिटी अस्पतालमा भइरहेको महानगरीय प्रहरी परिसरका डिएसपी अपिलराज बोहोराले जानकारी दिए । घाइते उरुषा मेडिसिटी अस्पतालमा नर्सिङ सेवा दिँदै आइरहेको अस्पताल प्रशासनले जानकारी दिएको छ ।
विष्फोटमा सुरक्षा गार्डको भूमिका शङ्कास्पद देखिएको महानगरीय प्रहरी परिसरका एसएसपी रमेशबहादुर धानुकले जानकारी दिए ।
घटनाबारे प्रहरीले सुक्ष्म अनुसन्धान सुरू गरेको उनले बताए । एनसेलको गेटमा राखिएको सिसिटिभी फुटेज हेर्दा सुरक्षा गार्डको भूमिका शङ्कास्पद देखिएको एसएसपी धानुकले बताए ।
घटना अनुसन्धानका लागि ६ जना व्यक्तिहरूलाई नियन्त्रणमा समेत लिइएको प्रहरीले जनाएको छ ।
विष्फोटलगत्तै घटनास्थलमा नेपाली सेना, नेपाल प्रहरी र राष्ट्रिय अनुसन्धान विभागका अधिकृतहरू पुगेका थिए । विष्फोट भएपछि प्रहरीले सुरक्षा सतर्कता बढाइएको छ ।
इन्सेक प्यूठान जिल्ला प्रतिनिधि रविन्द्र पाण्डेका अनुसार अज्ञात पक्षबाट फागुन १० गते राति करिव १० बजेको समयमा एनसेल फोनको टावरमा आगजनी भएको हो ।
स्वर्गद्वारी नपा–३ मा रहेको ऐनसेल कम्पनीको फोन टावरमा रातको समयमा आगजनी गरेको इलाका प्रहरी कार्यालय भिङ्ग्रीका इन्स्पेक्टर गिताप्रसाद चौधरीले बताए ।
सो फोन टावरका कस्ले किन आगजनी गरेको हो थाहा नभएको र आगजनी गर्नेहरूको खोजी भइीरहेको इन्स्पेक्टर चौधरीले बताए ।
आगजनीबाट टावरको जेनेरेटरलगाएत अन्य उपकरणमा क्षति भएको र क्षतिको परिमाण कति भएको भन्ने बारेमा एनसेको प्राविधिक पक्षले जनाएपछि मात्र थाहा हुने प्रहरीले जनायो ।
इन्सेक नवलपरासी (बर्दघाट सुस्ता पूर्व) जिल्ला प्रतिनिधि तिर्थराज डुम्रेका अनुसार मध्यविन्दु नपा–७ अम्रसामा रहेको एनसेल टावरमा फागुन १० गते राति विष्फोट भएको छ ।
एनसेल टावरमा राति ९ बजे विष्फोट भएको प्रहरीले जनाएको छ । विष्फोटपछि आगजनी हुँदा टावर ध्वस्त भएको जिल्ला प्रहरी कार्यालय नवलपरासी (बर्दघाट सुस्ता पूर्व)ले जनाएको छ । विष्फोटन गराउनेको पहिचान नभएको एसपी रमेश थापाले बताए ।
इन्सेक कास्की जिल्ला प्रतिनिधि सुशन घिमिरेका अनुसार पोखरा महानगरपालिका–२७ चन्द्रकालिका डाँडाको नाकस्थित एनसेलको टावरमा आगजनी गरिएको छ ।
माघ १० गते राति करिब १० बजेको समयमा आगजनी भएको प्रहरी कार्यालय शिशुवाका डिएसपी मोहनबहादुर खाँडले जानकारी दिए ।
‘पूर्ण क्षति भएको छैन । जेनेरेटरलगायतका सामानहरू सुरक्षित छन् ।’–डिएसपी खाँडले भने ।
आगो कसले लगायो भन्ने अहिलेसम्म खुल्न नसकेको उनले बताए ।
इन्सेक बागलुङ जिल्ला प्रतिनिधि सिर्जना पन्तका अनुसार फागुन ९ गते राति बागलुङमा रहेका एनसेलका तीन ओटा टावरमा अज्ञात पक्षले आगजनी गरेको छ ।
बागलुङ नगरपालिका–७ मुलपानी, गल्कोट नगरपालिका–८ काँडेवास र निसिखोला गाउँपालिका–७ राजकुतमा रहेको एनसेलको टावरमा अज्ञात पक्षले आगजानी गरेको जिल्ला प्रहरी कार्यालय बागलुङले जनाएको छ ।
एनसेल टावरमा कसले र के प्रयोजनको लागि आगजनी गरेको भन्ने विषयमा अनुसन्धान भइरहेको जिल्ला प्रहरी कार्यालय बागलुङका डिएसपी चिरञ्जीवी कोइरालाले बताए ।
टावरमा आगलागी भएको देखेपछि स्थानीयले गरेको खबरका आधारमा घटनास्थलमा पुगेको प्रहरीले अनुसन्धान थालेको कोइरालाले बताए ।
आगजनीबाट टावरमा भएको क्षतिको पूर्ण विवरण आउन बाँकी रहेको प्रहरीले जनाएको छ ।