१७ वर्षीया बालिकालाई बलात्कार गरेको कसुरमा जिल्ला अदालत कपिलवस्तुले देवदह नगरपालिका–४ पिप्रहियाका २२ वर्षीय सुनिल डंगोरिया भन्ने सुनिल थारुलाई १० वर्ष कैद सजायको फैसला गरेको छ ।
जिल्ला अदालतका न्यायाधीश दिनबन्धु बरालको ०८२ पुस २७ गतेको इजलासले आरोपितलाई कसुर ठहर गर्दै १० वर्ष कैद, ५ लाख जरिबाना र ५० हजार रुपियाँ क्षतिपूर्ति बापतको रकम पीडितलाई भराई दिने फैसला गरेको जिल्ला अदालतका स्रेस्तेदार अनन्त मरासिनीले जानकारी दिनुभयो ।
आरोपितले बालिकालाई ०७९ वैशाख १ गतेदेखि वैशाख १४ गतेसम्म विभिन्न डर धम्की देखाई पटक पटक बलात्कार गरेको भन्दै पीडित पक्षले वैशाख १६ गते दाजुको सहयोगमा जिल्ला प्रहरी कार्यालय कपिलवस्तुमा उजुरी दिएको थियो । पीडितको स्वास्थ्य परीक्षण वैशाख १६ गते कपिलवस्तु अस्पताल तौलिहवामा भयो । प्रहरीले आरोपितलाई ०७९ वैशाख १६ गते बानियाभरबाटै गिरफ्तार गरेको थियो ।