गत साउन १० गते बलात्कारपश्चात् हत्या गरिएकी कञ्चनपुरकी १३ वर्षीया बालिका निर्मला पन्तको घटना सम्बन्धमा राष्ट्रिय मानव अधिकार आयोगद्वारा कात्तिक २७ गते गठित विज्ञहरूसहितको टोलीले अनुसन्धान सम्पन्न गरी प्रतिवेदन पेश गरेको छ ।
अनुसन्धान टोलीबाट प्राप्त प्रतिवेदन उपर आयोगको बैठकले छलफल गरी माघ ९ गते निर्णय गरेको थियो । आयोगको विज्ञ टोलीले निर्मलाको भेजइजनल स्वावको नमूना सङ्कलन नै त्रुटिपूर्ण रहेको किटान गरेको छ ।
‘सोही निर्णय अनुसार आयोगले आज राष्ट्रिय मानव अधिकार आयोग ऐन २०६८ को दफा ४(१) बमोजिम नेपाल सरकार, प्रधानमन्त्री तथा मन्त्रिपरिषद् कार्यालयमा ४ बूँदे सिफारिश एवं २४ बूँदे निर्देशन सहितको पत्राचार गरेको छ । साथै यस घटनाको प्रहरीद्वारा अनुसन्धान प्रक्रिया अन्त्य नभएसम्म आयोगको अनुगमन जारी रहने छ ।’–आयोगद्वारा माघ १३ गते जारी विज्ञप्तिमा उल्लेख छ ।
पूर्व नायब महान्यायाधिवक्ता नरेन्द्र पाठकको संयोजकत्वमा गठित उक्त अनुसन्धान समितिमा पूर्व डिआइजी विज्ञानराज शर्मा, फरेन्सिक विज्ञ डा. हरिहर वस्ती, डि.एन.ए. विशेषज्ञ दिनेश झालगायत टोलीमा संलग्न थिए ।