कर्णाली प्रदेश सरकार अन्तर्गत कारागारलाई किताब अभियान सफल बनाउनका लागि पुस २९ गते एक कार्यक्रमका बीच जिल्लास्तरीय उपसमिति गठन गरिएको छ ।
समुदाय–प्रहरी साझेदारी कार्यक्रम अन्तर्गत ‘कारागारका बन्दीहरूको अर्को संसार कहाँ छ ? त्यो संसार किताबमा छ ।’ भन्ने नाराका साथ सुरू गरिएको यस अभियानको उपसमितिको संयोजकमा जिल्ला प्रहरी कार्यालय रूकुम पश्चिमका डिएसपी सुमित खड्का, सह–संयोजकमा इन्सेक जिल्ला प्रतिनिधि मनिषा केसी र सदस्य–सचिवमा इन्स्पेक्टर प्रमोद क्षेत्री रहेका छन् ।
जिल्ला प्रशासन कार्यालयका प्रतिनिधि, जिल्ला समन्वय समितिका प्रतिनिधि, कारागारका जेलर, प्राज्ञिक व्यक्ति, सञ्चारकर्मी लगायत ११ सदस्य रहेको उक्त उपसमितिले रूकुम कारागारमा रहेका कैदीबन्दीहरूका लागि अध्ययन गर्न पुस्तकालय स्थापना गर्ने बताइएको छ ।
यसका लागि स्थानीय तह, सरकारी तथा गैरसरकारी सङ्घसंस्थाहरूका साथै सहयोगी व्यक्तिहरूबाट नगद तथा पुस्तक सहयोग लिइने डिएसपी खड्काले बताए ।
प्रहरीले घटनापछि अपराधि पक्राउ गर्ने मात्र नभई सचेतनामूलक काम पनि गर्नुपर्ने नयाँ अवधारणा अनुसार विभिन्न क्रियाकलापहरू गर्दै आएको उनको भनाई छ ।
पुस्तकालय सञ्चालनका लागि केही बजेट भएपनि त्यसले नपुग्ने भएकोले अभियानमार्फत सहयोग लिएर यसलाई पूर्णता दिइने डिएसपी खड्काले बताए ।
कैदीबन्दीलाई सभ्य मानव भएर बाँच्न सिकाउनका लागि यो पुस्तकालयले महत्वपूर्ण भूमिका निर्वाह गर्ने जिल्ला समन्वय समितिका उपप्रमुख इन्दिरा विएमले बताइन् ।
मुसिकोट नगरपालिकाका प्रमुख देवीलाल गौतमले पहिले जेलमा यसरी पुस्तक पढ्न नपाइएको सुनाउँदै कहिलेकाँही बन्दीहरूलाई भेट्न जाँदा पुस्तकको माग गर्दै आएकोले त्यसको पूर्ति यस अभियानले गर्नेमा विश्वास व्यक्त गरे ।
त्यस्तै प्रमुख जिल्ला अधिकारी शम्भुप्रसाद रेग्मीले जेलभित्र पढ्न पाउने बन्दीहरूको अधिकारलाई समेत यसले प्रवर्धन गर्ने धारणा राखे । कारागारप्रतिको दृष्टिकोण फेर्ने र गल्तीको महसुस गरेर सुधार गर्न पुस्तकालयले सहयोग गर्ने उनको भनाई छ ।