कोशी प्रदेशमा ०८२ जेठ १६ गते भित्रिएको मनसुन पुन सक्रिय भएसँगै जिल्लाको साँगुरीगढी गाउँपालिका–६, स्थित मोक्तेनमा पहिरोका कारण नौ घर जोखिममा परेका छन ।
केही दिनयताको वर्षाका कारण तलबाट पहिरोले बस्ती नै तानेपछि साँगुरीगढीका नौ घर पहिरोको जोखिममा परेका हुन ।
पहिरोले कारण साँगुरीगढी गाउँपालिका–६, स्थित मोक्तेनका केवलप्रसाद मगर, मोहन मगर, विष्णबहादुर मगर, कुमारी मगर, राजकुमार मगर, भीमबहादुर मगर, प्रेमबहादुर मगर, रणबहादुर मगर र ज्ञान रानाको घर पूर्णरुपमा जोखिममा परेका छन् ।
रवि–राँके सडक निर्माणका कारण तलबाट पहिरोले बस्ती नै तान्दा घरहरु जोखिममा परेको साँगुरीगढी गाउँपालिका अध्यक्ष जितेन्द्र रुम्दाली राईले बताउनु भयो । पहिरोका कारण नौ घर जोखिममा परेसँगै ४२ जना घरपरिवारका सदस्यलाई सुरक्षित स्थानमा सारिएको गाउँपालिका अध्यक्ष रुम्दाली राईले बताउनु भयो ।
पहिरोले बस्ती तन्दा घरहरु भत्किएका, चिरा परेका र कतिपय घरमा बस्न नमिल्ने अवस्था भएको छ । इलाका प्रहरी कार्यालय भेडेटारका डिएसपी रमेश प्रधानले पहिरोका कारण जोखिममा परेकाहरुलाई स्थानान्तरण गरिएको बताउनु भयो ।
प्रमुख जिल्ला अधिकारी शिवराम गेलालले पहिरोका कारण जोखिममा परेकाहरुलाई तत्काल उद्दारका लागि सुरक्षाकर्मी खटाइएको बताउनु भयो । उहाँले राहतका लागि सम्पूर्ण जिम्मेवार तथा अधिकार स्थानीय सरकारलाई नै दिएको हुनाले पनि स्थानीय तहले केही काम गर्न नसकेको अवस्थामा माथिल्लो निकायसँग सहकार्य गर्ने गरी पहिरो पीडितहरुलाई उद्दार र राहतको व्यवस्था मिलाइने तयारी थालिएको बताउनु भएको छ ।