हरिपुर्वा नगरपालिका–६ का ४६ वर्षीय एक निजी विद्यालयका शिक्षक ४६ वर्षीय रामपुकार यादवलाई ०८२ साउन ३० गते राती अज्ञात समूहले गोली प्रहार गरी हत्या गरेको छ ।
शिक्षक यादव आफ्नै घर अगाडि छरछिमेकीसँग बसिरहेको अवस्थामा मोटरसाइकलमा आएका दुई जना व्यक्तिले टाउकोमा गोली प्रहार गरेका थिए । रामपुकार भनेको को हो ? भनी सोधेर नै गोली प्रहार गरेको स्थानीय ३४ वर्षीय दिपलाल यादवले बताउनु भयो ।
घाइते यादवलाई उपचारका लागि महोत्तरी जिल्लाको रामगोपालपुर स्थित जानकी एकेडेमिक हस्पिटल ल्याउँदै गर्दा बाटोमै मृत्यु भएको हस्पिटलका संचालक डाक्टर सुरेन्द्र कुमार यादवले जानकारी दिनु भयो ।
गोली प्रहार गरी फरार भएका व्यक्तिहरु चढेको मोटरसाइकल साउन ३० गते राती नै हरिपूर्वा नगरपालिका–७ मा दुर्घटनामा परेको छ । दुर्घटनामा एक जना गम्भीर घाइते भएका छन् । उनलाई सर्लाहीको लालबन्दी स्थित मोडेल अस्पतालबाट थप उपचारका लागि जनकपुर पठाइएको छ । उनको परिचय सार्वजनिक नगरेको र अर्का व्यक्ति भने अझै फरार रहेको जिल्ला प्रहरी कार्यालय मलंगवाका डिएसपी सरोज राईले जानकारी दिनु भयो ।
शव पोष्टमार्टमका लागि प्रादेशिक अस्पताल मलंगवा राखिएको प्रहरीले जनाएको छ ।