११ वर्षीया बालिकालाई यौन दुर्व्यवहार गरेको कसुरमा सजाय तोकिएका बराहक्षेत्र नगरपालिका–७ का ५९ वर्षीय अर्थराज कोइरालालाई प्रहरीले ०८२ साउन २० गते गिरफ्तार गरेको छ ।
बालिकालाई यौन दुर्व्यवहार गरेको कसुरमा जिल्ला अदालतका न्यायाधीश मुकेश उपाध्यायको असार ३२ गते इजलासले कसुर गरेको ठहर गर्दै दुई वर्ष कैद, २५ हजार रूपियाँ जरिबाना र पीडितले पाउने गरी कसुरदारबाट २ लाख रूपियाँ क्षतिपूर्ति भराउने फैसला गरेको थियो ।
जिल्ला अदालतको फैसलाले कोइरालालाई आफूविरुद्धको फैसलामा पुनरावेदन गर्ने बाटो भने खुला राखेका कारण कोइराला कैद भुक्तान नगरी मुद्दा लड्दै आएका थिए ।
कोइराला विरूद्ध प्रहरीले जिल्ला सरकारी वकिलको कार्यालयमार्फत जिल्ला अदालतमा ०८२ वैशाख २४ गते बालबालिकासम्बन्धी ऐन, २०७५ दफा ६ बमोजिम बाल यौन दुर्व्यवहार शीर्षकमा मुद्दा दर्ता गरेर कानुनी कारबाही अघि बढाएको थियो ।
जिल्ला अदालतका न्यायाधीश प्रकाश राउतको ०८२ वैशाख २५ गतेको आदेशले १ लाख रुपियाँ धरौटी माग गरेको थियो । आरोपित सोही दिन धरौटी बुझाएर रिहा भएका थिए ।
राष्ट्रिय स्वतन्त्र पार्टीका सभापति रवि लामिछानेको पक्षमा हस्ताक्षर गर्न साउन २० गते महेन्द्र चोक, विराटनगर पुगेका बेला कसुरदार कोइरालालाई गिरफ्तार गरिएको जिल्ला प्रहरी कार्यालय, मोरङकी डिएसपी कोपिला चुडाँलले बताउनु भयो ।
गिरफ्तारीमा परेका कोइरालालाई साउन २० गते इलाका प्रहरी कार्यालय, महेन्द्रनगर सुनसरीमा राखिएको छ । साउन २१ गते कोइरालालाई जिल्ला अदालतमा उपस्थित गराएर कैद भुक्तानका लागि कारागार पठाउने तयारी गरिएको जिल्ला प्रहरी कार्यालय, सुनसरीका डिएसपी योगराज खतिवडाले बताउनु भयो ।
बालिकालाई ०८२ वैशाख ७ गते यौन दुर्व्यवहार गरेको आरोपमा पीडित पक्षले आरोपितविरूद्ध इलाका प्रहरी कार्यालय, महेन्द्रनगरमा वैशाख ८ गते उजुरी दिएका थिए।
पीडित पक्षको उजुरीपछि फरार भएका आरोपितलाई प्रहरीले ०८२ वैशाख २४ गते गिरफ्तार गरेको थियो ।
पीडित बालिकाको स्वास्थ्य परीक्षण वैशाख ८ गते जिल्ला अस्पतलामा गरिएको थियो ।