गत असोज २८ गते मेलौली नगरपालिका–२ प्यानी स्थित सुर्नया नदीमा मृत (सडेको) अवस्थामा भेटिएकी ४५ वर्षीया सीता भट्टको हत्या गरेको आरोपमा प्रहरीले मेलौली नगरपालिका–३ रौतगाउँका ६० वर्षीय रामदत्त भट्ट (सीताका पति) र उनका २० वर्षीय छोरा कृष्णदत्त भट्टलाई कात्तिक १२ गते गिरफ्तार गरेको छ ।
सीताका माइती पक्षले कात्तिक ७ गते दिएको उजुरीका आधारमा प्रहरीले उनीहरूलाई गिरफ्तार गरेको हो । घटनाका अर्का आरोपित सिताकी सौता ४० वर्षीया धौली भट्ट फरार रहेको इलाका प्रहरी कार्यालय पाटनले जनाएको छ ।
घरेलु हिंसाबाट पीडित सीता भट्ट मेलौली नगरपालिका–३ सेली स्थित माइती घरमा बस्दै आएकी थिइन् । आज उपरान्त कुटपिट र हिंसा गर्दिनँ भनी पति रामदत्तले आश्वासन दिएपछि उनी भदौ ६ गते आफ्नै घरमा गएकी थिइन् । भदौ १२ गते छिमेकीलाई घाँस दिएको भन्दै पति रामदत्त, सौता धौली र छोरा कृष्णले कुटपिट गरेपछि भदौ १३ गतेदेखि सिता ‘बेपत्ता’ भएकी थिइन् ।
झण्डै डेढ महिनापछि असोज २८ गते सुर्नया नदीमा एउटा लास भेटियो । उक्त लाश सडेको अवस्थामा भएकाले राम्ररी चिनिन सक्ने अवस्थामासमेत थिएन ।
सीता हराएको भन्दै पति रामदत्तले दिएको निवेदनका आधारमा परिवारलार्ई बोलाएर प्रहरीले शवको पहिचान गर्ने प्रयास गर्यो । तर, परिवारले शव सीताको होइन भनेपछि उक्त शवलाई स्थानीय र प्रहरीले गाडेको इलाका प्रहरी कार्यालय पाटनका इन्स्पेक्टर राजेन्द्रबहादुर सिंहले बताए ।
प्रहरीले शवलाई जमीनमा गाडी शवसँग भएको ‘म्याक्सी र माला’ इलाका प्रहरी कार्यालय पाटनमा ल्याएको थियो । पछि उक्त म्याक्सी र माला सीताका माइती पक्षले सीता घर जानेबेलामा दिएको र उक्त शव सीताको भएको बतायो । आफूहरूले पनि सीता हराएको भनी प्रहरी चौकी सलेनामा निवेदन दिएको भएपनि शव भेटिने बेलामा प्रहरीले खबर नगरेको सीताका माइती पक्षको भनाई छ ।
विगतमा सीताले भोग्नुपरेको घरेलु हिंसा, एकाएक सीता बेपत्ता हुनु, घरका व्यक्तिहरूले शव सीताको होइन भन्दै अस्वीकार गर्नु र उक्त शवसँग भएको म्याक्सी र माला माइतीले सीतालाई दिएको पुष्टी भएपछि माइती पक्षले हत्या आरोपमा पति, छोरा र सौताका विरूद्धमा उजुरी दिएको थियो ।
नदीमा भेटिएको शवको नमुनाका लागि हड्डी ल्याइएको र अब माइती पक्षको रगत लिएर शवको पहिचान गरिने प्रहरीले जनाएको छ । आरोपितहरूलाई हिरासातमा राखी घटनाबारे थप अनुसन्धान भइरहेको इन्स्पेक्टर सिंहले बताए ।