सुस्त श्रवण शक्ति भएका विद्यार्थीका लागि निर्माणधीन आवासीय भवन अलपत्र भए पछि सुस्त श्रवण शक्ति भएका विद्यार्थीहरूलाई बस्न समस्यामा परेको छ ।
प्यूठान नगरपालिका-१ खैरास्थित भुवनेश्वरी मावि परिसरमा निर्माण थालिएको भवन दुई वर्षदेखि अलपत्र परेको छ । सम्बन्धित निकायको बेवास्ताले गर्दा भवन निर्माणले पूर्णता पाउन सकेको छैन भने निर्माण गरिएको संरचना घाँसले ढाकेको र जीर्ण हुँदै गएको छ ।
तीन वर्षअघि शहरी विकास तथा भवन निर्माण डिभिजन कार्यालय रोल्पाको सहयोगमा सुस्त श्रवण शक्ति भएका विद्यार्थीका लागि आवासीय भवन निर्माण थालिएको थियो ।
निर्माणधीन कक्षाकोठा र आवासीय भवन अलपत्र परेकाले लक्षित वर्गलाई समस्या भएको प्रधानाध्यापक मुक्तिप्रसाद पोख्रेलले बताए ।
कक्षाकोठा अभावले प्रभावकारी पठन पाठन र आवासका लागि समस्या भइरहेको सुस्त श्रवण स्रोत शिक्षक धनेश्वर पोख्रेलले गुनासो गरे । एकदेखि तीन कक्षासम्मका विद्यार्थीहरू एउटै कोठामा राखेर पढाउने गरेको उनले बताए । उनले कक्षा कोठा अभावले छात्र र छात्राहरूलाई एउटै कोठामा राख्नुपर्ने बाध्यता रहेको बताए ।
शान्ति तथा पूनःनिर्माण मन्त्रालय अन्तर्गत निर्माणधीन भवनहरूलाई सम्बन्धित स्थानीय तहले पूर्णता दिनुपर्ने प्रावधान रहेको जिल्ला सम्न्वय समितिका प्रमुख केशवराज आचार्यले बताए । अलपत्र भवन निर्माणलाई पूर्णता दिने विषयमा प्यूठान नगरपालिकाले पहल थाल्ने नगरप्रमुख अर्जुनकुमार कक्षपतिले जनाए ।
उक्त विद्यालयमा प्यूठान, गुल्मी, अर्घाखाँची जिल्लाका नौ जना छात्रा र २३ जना छात्र गरी ३२ जना सुस्त श्रवण शक्ति भएका विद्यार्थीहरू अध्ययनरत रहेको विद्यालयले जनाएको छ ।