१६ वर्षीया बालिकालाई सामूहिक बलात्कार गरेको कसुरमा पर्वतको कुश्मा नगरपालिका–१ पाङ सहस्रधाराका २३ वर्षीय शिशिर क्षेत्रीलाई जिल्ला अदालतले १० वर्ष कैद सजायको फैसला सुनाएको छ ।
न्यायाधीश सुर्यबहादुर थापाको इजलासले क्षेत्रीलाई असोज १७ गतेको फैसलाले १० वर्ष कैद सजाय सुनाएको हो ।
पीडित बालिकालाई क्षेत्री, १७ वर्षीय दुई जना बालक र न्यू सेवा गेष्ट हाउसका सञ्चालक ३८ वर्षीय शेरबहादुर हमालले ०७४ चैत १५ गते बलात्कार गरेको आरोपमा सोही दिन चारै जना आरोपितलाई प्रहरीले गिरफ्तार गरेको थियो ।
क्षेत्रीलाई मुलुकी ऐन अन्तर्गत कसुर ठहर गरी पाँच वर्ष र साङ्गठनिक अपराधमा संलग्न रहेको ठहर गरी पाँच वर्ष गरी १० वर्ष कैद सजाय सुनाइएको हो ।
उमेर नपुगेका दुई जना बालकमध्ये एक जनालाई पाँच वर्ष र एक जनालाई डेढ वर्ष सुधारगृहमा राख्ने गरी फैसला गरिएको छ । अदालतले होटल सञ्चालक हमाललाई भने सफाई दिएको छ ।