साल्पासिलिछो गाउँपालिका–३ चौकीडाँडाको गोठे बजारकी ४० वर्षीया मेनुका राईलाई कुटपिट गरी हत्या गरेको ठहरमा ४५ वर्षीय पति हर्कबहादुर राईलाई जिल्ला अदालतले असोज १५ गते १० वर्ष कैद फैसला सुनाएको छ ।
न्यायाधीश हरिश्चन्द्र इङ्गनामको इजालसले मुलुकी ऐन ज्यानसम्बन्धी महलको १४ नम्बर बमोजिम १० वर्ष कैद फैसला गरेको जिल्ला अदालत भोजपुरका डिठ्ठा खड्गबहादुर खत्रीले बताए ।
हर्कबहादुरले ०७५ जेठ १९ गते पत्नीलाई पेटमा लात्ती प्रहार गरेका थिए । लात्ती प्रहारबाट घाइते भएकी पीडितको मृत्यु जेठ २० गते भएको थियो ।
हर्कबहादुरलाई प्रहरीले जेठ २० गते गिरफ्तार गरी असार ३ गते अदालतमा पेश गरेको थियो । मृतक राईको जेठ २२ गते सङ्खुवासभा जिल्ला अस्पतालमा पोष्टमार्टम गरिएको थियो ।