खाँडाचक्र नपा–५ की १८ वर्षीया सरिता दमाईलाई कथित बोक्सी भएको तथा सन्तान नजन्माएको आरोपमा कुटपिट गरेको आरोपमा पतिसहित परिवारका चार जनालाई असोज ४ गते प्रहरीले गिरफ्तार गरेको छ ।
दुई वर्षसम्म सन्तान नजन्माएको र ‘बोक्सी’ भई घरमा नोक्सान गरेको भन्दै कुटपिट गरेको आरोपमा प्रहरीले सरिताका २६ वर्षीय पति अली दमाई, ५८ वर्षीय ससुरा बिजे दमाई, २२ वर्षीय देवर ऐन दमाई र ३४ वर्षीय जेठाजु पे्रम दमाईलाई घरैबाट गिरफ्तार गरेको हो ।
घरपरिवारले आफूलाई सन्तान नजन्माएको र बोक्सीको आरोप लगाउँदै दैनिक कुटपिट गर्ने गरेको भन्दै पीडितले असोज ३ गते जिल्ला प्रहरी कार्यालयमा उजुरी दिएकी थिइन् ।
पीडितको उजुरीपछि आरोपितलाई गिरफ्तार गरी अनुसन्धान सुरू गरिएको जिल्ला प्रहरी कार्यालयका डिएसपी विनोद शर्माले बताए ।
डिएसपी शर्माले गिरफ्तार गरिएका चारैजनाविरूद्ध सामाजिक भेदभाव तथा अन्य अपमानजनक कसुर र बोक्सीको आरोप अन्तर्गत मुद्दा दर्ता भएको जानकारी गराए । परिवारका सदस्यहरूको कुटपिटबाट छाति, घाँटी र पिठ्युमा चोट लागेकी घाइतेको उपचार जिल्ला अस्पताल कालिकोटमा गरिएको छ ।