नेत्रविक्रम चन्द विप्लव नेतृत्वको नेपाल कम्युनिष्ट पार्टीका प्रवक्ता खड्गबहादुर विश्वकर्मा प्रकाण्डलाई भोजपुर जिल्ला अदालतले भदौ २० गते धरौटीमा रिहा गरे लगत्तै प्रहरीले अदालत परिसरबाटै पुनः गिरफ्तार गरेको छ ।
न्यायाधीश हरिषचन्द्र इङ्गनामको इजलासले ६० हजार रुपियाँ धरौटीमा रिहा गर्ने आदेश दिएपछि धरौटी बुझाएर अदालतबाट निस्कने क्रममा भोजपुर प्रहरीले गिरफ्तार गरेको जिल्ला प्रहरी कार्यालयका इन्स्पेक्टर चरित्रविक्रम कार्कीले बताए ।
गिरफ्तारीमा परेका प्रकाण्डलाई प्रहरीले भदौ २० गते नै जिल्ला प्रहरी कार्यालय दाङ लगेको छ ।
प्रकाण्डले टेम्केमैयुङ गाँउपालिका–६ गुम्बामा ०७४ कात्तिक २८ गते हाल प्रदेश १ का मुख्यमन्त्री शेरधन राईको निर्वाचन प्रचारका लागि प्रयोग गरिएको गाडीलाई लक्षित गरी बम पड्काएको आरोप थियो ।
उनलाई भदौ ७ गते सर्वोच्च अदालतले थुनामुक्त गर्न आदेश दिएपछि काठमाडौँबाट विराटनगर एयरपोर्ट हुँदै भोजपुर जिल्ला अदालत लगिएको थियो ।