गैरकानुनी रूपमा थुना परेका नेत्र विक्रम चन्द नेतृत्वको नेपाल कम्युनिष्ट पार्टीको विद्यार्थी संगठन अखिल क्रान्तिकारी म्याग्दीका अध्यक्ष सम्राट सापकोटा असार ६ गते थुनामुक्त भएका छन् ।
जेठ १८ गते पर्वतको फलेवासमा भएको डोजरमा आगजनी घटनामा संलग्न भएको आरोपमा प्रहरीले उनलाई जेठ २६ गते गिरफ्तार गरेको थियो । उनलाई गैर कानुनी थुनामा राखिएको भन्दै उच्च अदालत पोखरा, बागलुङ्ग इजलासमा परेको बन्दी प्रत्यक्षीकरणसम्बन्धी मुद्दाको सुनुवाइ गर्दै अदालतले असार ६ गते रिहा गर्न आदेश दिएको हो ।
सार्वजनिक अपराध मुद्दामा दुई पटक म्याद थप गरेर राखिएका सापकोटालाई सात दिनमा जिल्ला प्रशासनमा बुझाउनु पर्नेमा ३५ दिन म्याद थप गरेर हिरासतमा राख्नु गैरकानुनी काम भएको अदालतको आदेशमा उल्लेख छ ।
नेपाल कम्युनिष्ट पार्टी पर्वतका सेक्रेटरी ढकबहादुर क्षेत्री पनि सोही आरोपमा प्रहरी हिरासतमा रहेका छन् ।
पर्वतको फलेबास नगरपालिकामा सडक चौडा पार्न प्रयोग गरिएको स्काभेटरमा आगजनी गरेको, मोदी हाइड्रोपावर लिमिटेडले निर्माण गरिरहेको २० मेघावाट क्षमताको तल्लो मोदीखोला जलविद्युत आयोजनाको कुस्मा नपा-७ परादीमा रहेको कार्यालयमा बम राखेकोलगायतका घटनामा संलग्न रहेको आरोपमा प्रहरीले उनीहरूलाई जेठ २६ गते गिरफ्तार गरेको थियो ।