अदालतले रिहा गर्न आदेश दिएलगत्तै नेत्रविक्रम चन्द विप्लव नेतृत्वको नेकपाका पोलिटव्यूरो सदस्य तथा पूर्व सभासद किरण राईलगायत चार जनालाई प्रहरीले जेठ १५ गते उच्च अदालत विराटनगर परिसरबाट पुनः गिरफ्तार गरेको छ ।
उच्च अदालत विराटनगरका न्यायाधीश कुलरत्न भुर्तेलले रिहा गर्न आदेश दिएपछि बाहिरिँदै गरेका उनीहरूलाई प्रहरीले गिरफ्तार गरेको हो ।
अदालत परिसरबाटै गिरफ्तार हुनेमा ४२ वर्षीय किरण राई, ३५ वर्षीय माधव गौतम, ३१ वर्षीय नवराज भट्टराई र ३० वर्षीय दिप्सन लिम्बू रहेका छन् ।
राईले अदालतको आदेशको पालना नगरेर राज्यले आफूहरूलाई फरक विचार र आस्था राख्दैमा विभेद गरेको प्रतिक्रिया दिए । गत चैत ५ गते धनकुटाको हिलेबाट गिरफ्तार भएका उनीहरूलाई चैत २९ गते जिल्ला अदालतले छोड्न आदेश दिए लगत्तै उदयपुर प्रहरीले लगेको र वैशाख २९ गते पुनः गिरफ्तार गरी मोरङको उर्लाबारी ल्याएको थियो ।
पटकपटक अदालतले रिहा गर्न आदेश गर्दापनि अटेर गरेर प्रहरीले ज्यादती गरेको सो पार्टी महिला सङ्गठन केन्द्रीय सदस्य मनु अच्छामीले बताइन् । अधिवक्ता विनोद तिम्सिनाले राज्यले अदालतले गरेको निर्णय कार्यान्वयन गर्नुको सट्टा गिरफ्तार गर्नु न्याय सङ्गत नभएको बताइन् ।