भदौ २४ गते जेनजी आन्दालेनका क्रममा घाइते भएका वीरेन्द्रनगर नगरपालिका–२ का २६ वर्षीय सन्तोष बोहरालाई कात्तिक १४ गते थप उपचारका लागि काठमाण्डौं लगिएको छ । आन्दोलनका क्रममा वीरेन्द्रनगर नगरपालिका–७ इत्राममा ०८२ भदौ २४ गते प्रहरीले चलाएको गोली दाहिने आँखामा लागेर सन्तोष घाइते हुनुभएको थियो । प्रदेश अस्पताल सुर्खेतमा उपचार सम्भव नभएपछि उहाँलाई नेपालगञ्ज शिक्षण अस्पतालमा उपचार गरिएको थियो । चिकित्सकका अनुसार उहाँको दुवै आँखाका नानी गुमेका छन् । थप उपचारका लागि कात्तिक १४ गते बिहान नेपालगञ्जबाट हवाई मार्फत तिलगंगा आँखा अस्पताल काठमाण्डौं र टिचिङ अस्पतालमा लिइएको उहाँकी पत्नी निर्मला खड्काले जानकारी दिनुभयो । उहाँका अनुसार, सन्तोषको अस्पताल भित्रको सम्पूर्ण खर्च अस्पताल प्रशासनले निःशु्ल्क गरेपनि यातायात, अस्पताल भित्र नपाइने औषधि लगायतका सामग्रीहरु किन्दा आर्थिक समस्या भएको छ । आफन्तजन र दाताहरुको सहयोगले खर्च व्यवस्थापन गरिरहेको निर्मलाले बताउनु भयो ।
सन्तोषको परिवारको आर्थिक अवस्था कमजोर छ । पाँच कठ्ठा जमिन र एउटा घर मात्रै छ । बेरोजगार रहनुभएका सन्तोष कोरोसिया जाने तयारीमा हुनुहुन्थ्यो । तर, आन्दोलनमा घाइते भएर दुबै आँखा गुमाएपछि उहाँको सपना पुरा हुन सकेन ।
सन्तोषको घरमा आमा बुवा र पत्नी, छोरी रहेका छन् । आन्दोलनमा भएको तोडफोड र आगजनीका घटनाहरूको अभिलेख इन्सेक कर्णाली प्रदेश कार्यालयको गरेको छ । अभिलेखित घटना अनुसार आन्दोलनका क्रममा कर्णाली प्रदेशमा ३५ जना घाइते भएका थिए । घाइतेहरु मध्ये १८ जनालाई गोली लागेको छ ।
कर्णाली प्रदेश कार्यालय