इलाका प्रहरी कार्यालय खिलतपुर दाङमा कार्यरत प्रहरी इन्स्पेक्टर ३४ वर्षीय मोहनविक्रम केसीलाई कुटपिट गरेको आरोपमा प्रहरीले दुइ जनालाई प्रहरीले गिरफ्तार गरेको छ ।
जेठ २२ गते राति गस्तीबाट फर्कदै गरेका केसीलाई मदिरा सेवन गरी हल्ला गर्दै हिडेका बबई गाउँपालिका–६ पञ्चकुलेका ४९ बर्षीय चित्र डाँगी र उनका छोरा २७ बर्षीय हेमराज डाँगीले लाठी र ढुंगा प्रहार गरी घाइते बनाएको इलाका प्रहरी कार्यालय तुलसीपुरका इन्स्पेक्टर चक्रडम्वर पालले जानकारी दिनुभयो ।
स्थानीय विद्यालयमा रहेको क्वारेन्टाइन नजिकै मदिरा सेवन गरेर होहल्ला गर्न थालेपछि सम्झाउन खोज्दा बाबुछोराले प्रहरी इन्स्पेक्टरमाथि कुटपिट गरेका थिए । लगत्तै स्थानीयले प्रहरीको उद्दार गरेका थिए । कुटपिटबाट टाउकोमा चोट लागेका इन्स्पेक्टर केसीको राप्ती प्रादेशिक अस्पताल तुलसीपुरमा जेठ २३ गते उपचार भएको छ । उपचारपछि केसी काममा फर्किसक्नु भएको छ । पीडित इन्स्पेक्टरले कुटपिट भएको भन्दै लिखित जाहेरी इप्रका तुलसीपुरमा जेठ २३ गते दिनुभएको छ भने कुटपिटमा संलग्न दुवैजनालाई इलाका प्रहरी कार्यालयले गिरफ्तार गरी अनुसन्धान थालेको छ ।