निर्वाचन विरोधी गतिविधिमा लागेको आरोपमा प्रहरीले नेत्रविक्रम चन्द नेतृत्वको नेपाल कम्युनिष्ट पार्टीका तीन जना कार्यकर्तालाई धनकुटाको विभिन्न स्थानबाट कात्तिक २९ गते गिरफ्तार गरेको छ ।
निर्वाचन विरोधी गतिविधि गरेको आरोपमा सो पार्टीका जिल्ला सदस्य धनकुटा नपा-७ का ५० वर्षीय मोहनप्रसाद ओझा (विज्ञान), कार्यकर्ता पाख्रीवास नपा-४ का २२ वर्षीय प्रेम कट्टेल र खाल्सा छिन्ताङ शहिदभूमि गाउँपालिका-६ थलथलेका ४० वर्षीय नरजित राईलाई गिरफ्तार गरिएको जिल्ला प्रहरी कार्यालय धनकुटाका एसपी सुदिप राजभण्डारीले बताए ।
आरोपित ओझालाई धनकुटाको हिलेबजार, कट्टेललाई पाख्रीवास बजार र राईलाई आँखिसल्लाको थलथलेबजारबाट गिरफ्तार गरिएको प्रहरीले जनाएको छ ।
यसअघि भएको स्थानीय तहको निर्वाचनमा पनि निर्वाचन विरोधी गतिविधि गरेको आरोपमा धनकुटाबाट सो पार्टीका जिल्ला इञ्चार्जसहितका कार्यकर्तालाई प्रहरीले गिरफ्तार गरेको थियो ।
उनीहरू निर्वाचन सम्पन्न भएपछि छुटेका थिए । निर्वाचनको मिति नजिकिएसँगै प्रहरीले सो पार्टीको कार्यकर्तामाथि निगरानी बढाएको छ ।