राष्ट्रिय मानव अधिकार आयोगले सप्तरीको राजविराजमा जेठ २८ गते निर्वाचन आयोगका प्रमुख निर्वाचन आयुक्त अयोधीप्रसाद यादवको सहभागितामा हुन लागेको कार्यक्रम बिथोल्ने गरी भएको घटनाप्रति ध्यानाकर्षण भएको जनाएको छ ।
‘आफ्ना विचारहरू राख्ने शान्तिपूर्ण बाटो हुँदाहुँदै एक स्वतन्त्र संवैधानिक निकायका प्रमुखलाई कालो झण्डा देखाउने तथा निर्धारित कार्यक्रम बिथोल्ने जस्ता कार्यबाट पारस्परिक सद्भाव, लोकतन्त्रको अभ्यास र मानव अधिकारको सुनिश्चिततामा बल पुग्ने देखिँदैन । कुनै पनि संवैधानिक निकायलाई संवैधानिक कार्यादेश अनुसार स्वतन्त्र र निष्पक्ष रूपमा कार्य गर्न दिने वातावरणको सिर्जना गर्नु सम्बन्धित सबै पक्षको कर्तव्य हुन आउँदछ ।’-आयोगद्वारा जेठ २९ गते जारी प्रतिवेदनमा उल्लेख छ ।
विज्ञप्तिमार्फत लोकतन्त्र र मानव अधिकारको जग निर्वाचन नै भएको हुँदा निर्वाचनको वातावरण वनाउन तथा निर्वाचन विरोधी क्रियाकलाप नगर्न, नगराउन आयोगले सम्बद्ध सबै पक्षसँग आग्रह गरेको छ ।
आफ्ना फरक अभिमतलाई संविधान र कानुनसम्मत ढङ्गबाट अभिव्यक्त गर्न तथा फरक मतको सम्मान गर्नुमा नै मावन अधिकारको मर्म अन्तर्निहित रहने भएको जनाउँदै आयोगले वार्ता र सम्वादको ढोका खुल्ला राख्न समेत सम्बन्धित पक्षलाई आग्रह गरेको छ ।