निर्वाचन विरोधी गतिविधि गरेको आरोपमा नेपाल कम्युनिष्ट पार्टीका चार जना कार्यकर्तालाई अदालतको आदेश अनुसार जेठ २१ गते धरौटीमा रिहा गरेपनि प्रहरीले रिहा लगत्तै सोही दिन पुनः गिरफ्तार गरेको छ ।
नेपाल कम्युनिष्ट पार्टीका कार्यकर्ता शारदा नपा-१ का घनश्याम बिक, दार्मा गाउँपालिका-३ का मोहन केसी, ढोरचौर गाउँपालिका-१ का सुकलाल बस्नेत र रोल्पा सुकिदह गाउँपालिका-४ का टोपबहादुर डाँगीलाई प्रहरीले गिरफ्तार गरेको हो । वैशाख २० र २२ गते अलगअलग स्थानबाट गिरफ्तार भएका उनीहरूलाई प्रहरीले सार्वजनिक मुद्दा लगाएको थियो ।
हिरासत र कारागारमा गरी एक महिना भन्दा बढी थुनामा रहेपछि उनीहरूलाई जेठ २१ गते प्रति व्यक्ति ५/५ हजार धरौटी तोकेपछि आवश्यक प्रक्रिया पुर्याएर बाहिर निस्कने बित्तिकै पुनः गिरफ्तार गरिएको जिल्ला प्रहरी कार्यालयका डिएसपी श्यामबहादुर खत्रीले बताए ।
सल्यानका प्रमुख जिल्ला अधिकारी भरतकुमार बुढाथोकीले पनि आफूहरूले अदालतको आदेश अनुसार धरौटीमा छोडे पनि निर्वाचनका बेला नराम्रो गतिविधि हुने भएकाले गृह मन्त्रालयकै निर्देशन अनुसार पुनः गिरफ्तार गरिएको बताए ।
यसैबीच नेपाल कम्युनिष्ट पार्टी सल्यानका इञ्चार्ज डिल्लीराज शर्माले आफूहरूको शान्तिपुर्ण आन्दोलनमा प्रहरीले हस्तक्षेप गरेको र निर्वाचन सकिँदा पनि कार्यकर्तालाई धरपकड र हस्तक्षेप गर्नु सरकारको नालायकीपन भएको आरोप लगाए ।
आफ्ना कार्यकर्तालाई प्रहरीले पुनः गिरफ्तार गरेको विरोध गर्दै नेपाल कम्युनिष्ट पार्टीका कार्यकर्ताले जेठ २२ गते सल्यान जिल्ला बन्दको आह्वान गरेपनि बन्दको प्रभाव परेको छैन ।