स्थानीय निर्वाचनको विरोध गर्नुका साथै निर्वाचन विरोधी गतिविधिमा संलग्न भएको आरोपमा नेपाल कम्युनिष्ट पार्टीका चार जना कार्यकतालाई वडा प्रहरी कार्यालय चन्द्रौटाले गिरफ्तार गरेको छ । प्रहरीले वैशाख ३० गते नेपाल कम्युनिष्ट पार्टीको ५ नम्बर क्षेत्रका क्षेत्र इन्चार्ज खुमानसिहं परियार, जिल्ला सदस्य राजेन्द्र प्रसाद शाह, वडा समिति सदस्य नन्दलाल पुरी र पश्चिम कमान्डर मान बहादुर बुढालाई उनीहरूको घरबाटै गिरफ्तार गरेको वडा प्रहरी कार्यालय चन्द्रौटाले जानकारी दिएको छ ।
निर्वाचन आचार संहिता विपरित सो पार्टीले आह्वान गरेको नेपाल बन्दका कारण कपिलवस्तुको जनजीवन प्रभावित बनेको छ । बिहान देखि लामो तथा छोटो दुरीका यातायातका साधन चल्न सकेका छैनन् भने उद्योगधन्दा कलकारखाना, बजार बन्द रहेका छन् । जिल्लाका चन्द्रौटा, गोरुसिहें, जितपुर, ओदारी, तौलिहवा, महाराजगन्ज, पकडी, लबनी लगायतका बजार बन्द रहेका छन् भने प्रेस, एम्बुलेन्स, मानवअधिकारकर्मी, कुटनीतिक नियोगका साधन, विवाहका सवारी साधन भने संचालन रहेका छन् ।