स्थानीय तहको निर्वाचन विरोधी गतिविधि गरेको आरोपमा नेत्रविक्रम चन्द नेतृत्वको नेपाल कम्युनिष्ट पार्टीका पाँच जना कार्यकर्तालाई प्रहरीले वैशाख २७ गते गिरफ्तार गरेको छ ।
गिरफ्तार पर्नेमा कुशे गाउँपालिका-५ का एरिया सदस्य कर्णबहादुर थापा, सोही ठाउँका बलबहादुर मल्ल, जिल्ला सदस्य नवराज बिक, मानबहादुर बिक र त्रिवेणी नलगाड नपा-३ घर भई हाल भेरी नपा-३ बस्ने जिल्ला सचिवालय सदस्य डम्बरबहादुर सिंह रहेका छन् ।
नेपाल कम्युनिष्ट पार्टीका जिल्ला सेक्रेटरी अमर वली (अमृत)का अनुसार स्थानीय तहको निर्वाचन बिथोल्ने र जनताको मताधिकार हनन् गर्ने पार्टीको कुनै निर्णय छैन । नेपाल कम्युनिष्ट पार्टीले वैशाख २७ गते प्रेस विज्ञप्ति जारी गर्दै गिरफ्तार गरिएका कार्यकर्तालाई तुरुन्त रिहाइको माग गरेको छ । उक्त विज्ञप्तिमा भनिएको छ-‘हाम्रो आग्रहलाई बेवास्ता गरिए जस्तो सुकै परिस्थिति आउन सक्छ । त्यसको भागिदार राज्य स्वयम् हुनु पर्नेछ ।’
जिल्ला प्रहरी कार्यालयका डिएसपी भावेश रिमालले आगामी स्थानीय तहको निर्वाचनको विरोधका गतिविधि गर्न सक्ने भन्दै नेपाल कम्युनिष्ट पार्टीका कार्यकर्तालाई गिरफ्तार गरिएको जानकारी दिए ।
भेरी नपा-१ रिम्नामा सो पार्टीका कार्यकर्ताले केही दिन अगाडि स्थानीय तहको निर्वाचन आवश्यक नभएको र जनमुखी निर्वाचन नभएको भन्दै निर्वाचनसम्बन्धी पर्चा पम्पलेट च्यातेको प्रहरीले जनाएको छ ।