स्थानीय तहको निर्वाचनलाई असफल बनाउन वम बनाउन तयार गरेको सामग्रीसहित प्रहरीले बर्दिबासबाट नेत्रविक्रम चन्द नेतृत्वको नेपाल कम्युनिष्ट पार्टीका तीन जना कार्यकतालाई वैशाख २४ गते गिरफ्तार गरेको छ ।
गिरफ्तार हुनेहरूमा धनुषा जिल्ला धनुषाधाम नपा-५ का सो पार्टीका जनकपुर ब्यूरो सदस्य ५५ वर्षीय महोम्मद आदन राइन्, सोही ठाउँका कार्यालय सदस्य ३६ वर्षीय तिलक भनिने प्रानकुमार लामा र ५१ वर्षीया मिथिला चौहान रहेको इलाका प्रहरी कार्यालय बर्दिवासका डिएसपी शालिग्राम शर्माले बताए । सिन्धुलीमा वम पड्काउने उनीहरूको योजना रहेको डिएसपीले शर्माले जनाए ।
विशेष सुराकीको आधारमा डिएसपी शर्मा नेतृत्वको टोलीले बर्दिबास नपा-३ गौरीडाँडास्थित ज्ञानप्रसाद पौडेलको घर भाडा लिई वम बनाउन तयार गरेको सामग्रीसहित उनीहरूलाई गिरफ्तार गरेको इलाका प्रहरी कार्यालय बर्दिबासले जनाएको छ ।
उनीहरू बस्दै आएका स्थानबाट ६ वटा प्रेसर कुकर बम, तेजाब दुई बोतल, बारूद बनाउने धुलो ३ सय ग्राम, टाइम बम बनाउन मिल्ने तार जडित भित्ते घडी दुई थान, सोलडिङ् तार र सोलडिङ आइरन, सोलडिङ पेष्ट, वम पड्काउने योजना सहितको नक्सा, गन्धक दुई केजी बरामद भएको प्रहरीले जनाएको छ ।
उनीहरू बसेकै कोठाबाट ल्याप्टप दुई थान, स्थानीय निर्वाचन खारेजीसम्बन्धी लेखिएका पर्चा २ सय थान, काङ्ग्रेसको रूख छाप भएको टिसर्ट दुई थान, मोवाइल ६ थान, निर्वाचन खारेजी गर भन्ने लेखिएको पर्चा १ सय थान, पार्टी सदस्य फाइलहरू, पार्टी नविकरणको फाइलहरू, कदर पत्र, पार्टी छाप चार थान, सानो घडी दुई थान, सहयोग रसिदहरू र टेस्टरलगायतका सामग्रीसहितको बाकस प्रहरीले बरामद गरेको छ ।
गिरफ्तार उनीहरूलाई जिल्ला प्रहरी कार्यालय महोत्तरीमा राखी घटनाको अनुसन्धान जारी राखेको प्रहरीले जनाएको छ ।