१४ वर्षीया बालिकालाई सामूहिक बलात्कार गरेको कसुरमा जिल्ला अदालतले शिवसताक्षी नगरपालिका–४ का २१ वर्षीय सुजन चौहानलाई १८ वर्ष,सोही ठाउँका २४ वर्षीय शम्भु गिरी र अर्जुनधारा नगरपालिका–१ का ३१ वर्षीय सुजुन भनिने सुदन थापालाई तीन वर्ष कैद सजायको फैसला सुनाएको छ ।
न्यायाधीश शङ्कर राईको पुस १३ गतेको इजलासले कसुर गरेको ठहर गर्दै चौहानलाई १ लाख रुपियाँ,गिरी र थापालाई जनही ५० हजार रुपियाँ जरिबाना भराउन आदेश भएको अदालतका सूचना अधिकारी अर्जुनप्रसाद गुरागाँइले इन्सेक प्रतिनिधिसँगको फोन सम्पर्कमा बताउनु भयो । अदालतको सोही आदेशले आरोपित ३२ वर्षीया इन्द्रकुमारी गिरीलाई सफाइ दिएको छ ।
पीडित बालिकालाई आरोपितहरूले ०७७ साउन २७ गते बलात्कार गरेको आरोपमा पीडित पक्षले आरोपितविरूद्ध भदौ १ गते इलाका प्रहरी कार्यालय झिलझिलेमा उजुरी दिएको थियो ।
आरोपित सबैलाई प्रहरीले भदौ १ गते घरबाट गिरफ्तार गरी जिल्ला अदालतमा भदौ २४ गते बलात्कार शीर्षकमा मुद्दा दर्ता गरेको थियो ।
जिल्ला अदालतको भदौ २६ गतेको आदेशले सुजन चौहान, शम्भु गिरी र सुदन थापालाई पुर्पक्षका लागि थुनामा पठाएको थियो । अदालतको सोही आदेशले इन्द्रकुमारीसँग १ लाख रुपियाँ धरौटी माग गरेको थियो ।
पीडितको स्वास्थ्य परीक्षण मेची अस्पतालमा ०७७ भदौ १ गते गरिएको थियो ।