१५ वर्षीया बालिकालाई बलात्कार गरेको कसुरमा जिल्ला अदालतले बुद्वशान्ति गाउँपालिका‒२ का २९ वर्षीय दिलकुमार कामीलाई १२ वर्ष कैद सजायको फैसला सुनाएको छ ।
न्यायाधीश गिरीराज गौतमको मङ्सिर २८ गतेको इजलासले कसुर गरेको ठहर गर्दै कैद सजायको आदेश भएको अदालतका सूचना अधिकारी अर्जुनप्रसाद गुरागाँइले बताउनु भयो ।
पीडित बालिकालाई आरोपितले ०७६ माघ १६ गते बलात्कार गरेको आरोपमा पीडित पक्षले आरोपितविरूद्ध माघ २० गते इलाका प्रहरी कार्यालय अनारमनीमा उजुरी दिएको थियो ।
पीडित पक्षको उजुरीका आधारमा आरोपितलाई सोही दिन गिरफ्तार गरी जिल्ला अदालतमा ०७६ फागुन १४ गते बलात्कार शीर्षकमा मुद्दा दर्ता गरी कारबाही अघि बढाएको थियो । जिल्ला अदालतको ०७६ फागुन १६ गते आदेशमा आरोपित पुर्पक्षका लागि थुनामा गएका थिए ।
पीडित बालिकाको स्वास्थ्य परीक्षण मेची अस्पतालमा ०७६ माघ १६ गते गरिएको थियो ।