१४ वर्षीया बालिकालाई बलात्कार गरेको कसुरमा जिल्ला अदालतले खाँदबारी नगरपालिका‒८ का १९ वर्षीय अनिश मगरलाई १० वर्ष कैद सजायको फैसला सुनाएको छ ।
न्यायाधीश शान्तिप्रसाद आचार्यको मङ्सिर १५ गतेको इजलासले कसुर गरेको ठहर गर्दै कैद सजायसँगै कसुरदारबाट ५० हजार रुपियाँ पीडितले पाउने गरी क्षतिपूर्ति भराउन र १ हजार ८ सय रुपियाँ राहत कोषमा जम्मा गर्न आदेश भएको अदालतका सूचना अधिकारी डिल्ली प्रसाईले इन्सेक प्रतिनिधिसँगको फोन सम्पर्कमा बताउनु भयो ।
पीडित बालिकालाई आरोपितले ०७८ वैशाख ३ गते बलात्कार गरेको आरोपमा पीडित पक्षले आरोपितविरूद्ध वैशाख ४ गते जिल्ला प्रहरी कार्यालयमा उजुरी दिएको थियो ।
आरोपितविरूद्ध प्रहरीले जिल्ला अदालतमा वैशाख २८ गते बलात्कार शीर्षकमा मुद्दा दर्ता गरी कारबाही अघि बढाएको थियो ।
पीडित बालिकाको स्वास्थ्य परीक्षण जिल्ला अस्पताल सङ्खुवासभामा ०७८ वैशाख ५ गते गरिएको थियो ।