राजविराज नगरपालिकाको पर्साहीस्थित राजविराज नगरपालिका–१४ को कार्यालयमा १० दिनदेखि भएको तालाबन्दीका कारण सम्पूर्ण कामकाज ठप्प हुँदा सेवाग्राही मर्कामा परेका छन् ।
गाउँलेहरूले कात्तिक २६ गते राखेको सार्वजनिक सुनुवाइ कार्यक्रममा जनप्रतिनिधि र कर्मचारीहरू उपस्थित नभएको आक्रोशमा स्थानीयले सोही दिन तालाबन्दी गरेका थिए ।
१० दिनदेखि तालाबन्दी हुँदा वडा कार्यालयबाट हुने व्यक्तिगत घटना दर्तालगायतका सबै सेवा पूर्ण रूपले ठप्प भएको छ ।
लामो समयसम्म तालाबन्दी हुँदा समेत खोल्नेतर्फ कसैले चासो नदिएको स्थानीइले आरोप लगाएका छन् ।
स्थानीय सरकारका रूपमा रहेको वडा कार्यालयमा तालाबन्दीका कारण कामकाज नै रोकिनु दुःखद् रहेको स्थानीय बासुदेव मण्डलले बताउनुभयो ।
वडा अध्यक्ष शोभालाल मण्डलले सुरक्षाका कारण देखाएर सार्वजनिक सुनवाइमा नगएको बताउनु भयो । प्रहरी, पत्रकारहरू नबोलाई गाउँलेहरूले आयोजना गरेको सार्वजनिक सुनवाइमा कर्मचारीहरू समेत जान नमानेकाले आफू पनि नगएको उहाँले बताउनुभयो ।
तालाबन्दी गर्नु बेठिक भएको भन्दै वडा अध्यक्ष मण्डलले ताला लगाउनेले नै ताला खोल्नुपर्ने बताउनुभयो ।
वडा अध्यक्ष मण्डलले तालाबन्दीका कारण जनता मर्कामा परेकाले ताला खोल्ने विषयमा जिल्ला प्रशासन कार्यालय सप्तरीसँग सहकार्य भइरहेको बताउनु भयो ।