कोभिड–१९ सङ्क्रमण उच्च भएको अवस्थामा जिल्ला अस्पतालाई कोभिड–१९ अस्पतालका रूपमा रुपान्तरण गरी सञ्चालनमा ल्याइएको कोभिड–१९ अस्पतालमा जनशक्ति अभाव हुँदा सेवा प्रभावित हुन पुगेको छ ।
सङ्घीय सरकार र प्रदेश सरकारको ३ करोड १६ लाखको रुपियाँको लगानीमा निर्माण गरिएको कोभिड–१९ अस्पतालमा जनशक्ति अभाव हुँदा जडान गरिएका स्वास्थ्य उपकरणहरू समेत प्रयोगविहीन भएको नगरपालिकाका स्वास्थ्य शाखा सहसंयोजक तेजबहादुर पोखरेलले बताउनु भयो ।
जनशक्ति अवाभमा ६६ बेडको कोभिड अस्पताल एक जना विशेषज्ञका भरमा सञ्चालन गरिरहनु पर्दा सेवा प्रभावित भएको स्वास्थ्य शाखा सहसंयोजक पोखरेलको भनाइ छ ।
प्रशासनिक हिसाबले जिल्ला अस्पताल क श्रेणीमा छ । तर सेवा सुविधा भने कमजोर छ । जिल्ला अस्पतालमा ११ औँ तह (सहसचिव) स्तरका प्रमुख कन्सल्टेन्ट एक जना, विशेषज्ञ डाक्टर नौ जना, मेडिकल अफिसर चार जना र अन्य प्राविधिक र कर्मचारी गरी ५९ जनाको दरबन्दी छ ।
कोभिड–१९ को महामारीका समयमा सङ्घीय सरकार र प्रदेश सरकारको निर्णयमा अस्पतालमा आवश्यक स्वास्थ्य उपकरण जडान भएपनि जनशक्ति अभावमा प्रयोगविहीन भएको प्रमुख जिल्ला अधिकारी तुलसीराम सेढाईले बताउनु भयो ।
जिल्ला अस्पतालको भेन्टिलेटर सञ्चालन र कोभिड अस्पताललाई सहज रूपले सञ्चालन गर्न पटक–पटक निर्णय गरि सम्बन्धित ठाउँमा पत्राचार गरेपनि जनशक्ति अभावको समस्या समाधान नभएको प्रमुख जिल्ला अधिकारी सेढाईको भनाइ छ ।
