बागलुङ प्रतिनिधि सिर्जना पन्तका अनुसार बागलुङको बडिगाड गाउँपालिकामा सङ्क्रमितको दर बढ्दै गएपछि बडिगाड डोजोको कभर्ड हलमा अक्सिनसहित १० बेडको आइसोलेशन कक्ष निर्माण गरिएको गाउँपालिकाका स्वास्थ्य शाखा संयोजक चुडामणि कँडेलले बताउनुभयो । अहिले बडिगाडमा ४९ जना कोभिड–१९ का सक्रिय सङ्क्रमित रहेका छन् । सङ्क्रमितमध्ये तीन जनाको धौलागिरी अञ्चल अस्पतालमा उपचार भैरहेको छ भने अन्य होम आइसोलेशनमा रहेको कँडेलले बताउनुभयो । बागलुङको काठेखोला गाउँपालिकाले अस्थायी कोभिड–१९ अस्पताल सञ्चालनमा ल्याएको छ । भीमसेन प्राथमिक विद्यालयको भवनमा आवश्यक पूर्वाधार निर्माण गरेर १० बेडको अस्थायी अस्पताल सञ्चालनमा ल्याएको गाउँपालिका स्वास्थ्य शाखाका प्रमुख रामचन्द्र लामाले बताउनुभयो । गाउँपालिकाले अस्थायी अस्पतालमा तीन जना नर्स, एक जना जनस्वास्थ्य अधिकृत र एक जना कार्यालय सहयोगी अस्पतालमा खटाएको छ ।
कास्की प्रतिनिधि सुशन घिमिरेका अनुसार कास्कीमा सङ्क्रमितका सङ्ख्या बढेसंगै पोखरा स्वास्थ्य विज्ञान प्रतिष्ठान अन्तरगतको गण्डकी अस्पताल र गण्डकी प्रदेश सरकारले सञ्चालन गरेको सरुवा रोग तथा सङक्रामक अस्पतालमा सङ्क्रमितहरु अस्पतालमा बेड भरिएका छन् । त्यस्तै पोखरा स्वास्थ्य विज्ञान प्रतिष्ठानका प्रमुख डा अर्जुन आचार्यका अनुसार अस्पताल भर्ना भएकामध्ये ९० प्रतिशत बिरामीको स्वास्थ्य अवस्था नाजुक रहेको छ । अब गण्डकी अस्पतालमा जटिल अवस्थाका बिरामी आए पनि राख्न सक्ने अवस्था नरहेको उहाँले बताउनुभयो । यस्तै गण्डकी प्रदेश सरकारले सञ्चालन गरेको सरुवा रोग तथा सङ्क्रामक अस्पताल शिशुवाका निर्देशक विकास गौचनका अनुसार उक्त अस्पतालमा पनि थप बिरामी भर्ना गर्न सक्ने अवस्था नरहेको बताउनुभयो । दुवै अस्पतालमा गरी १ सय ५० बढी सङ्क्रमित रहेका छन् । गण्डकी प्रदेशबाट मात्रै नभएर बुटवल, दाङदेखि बेड खोज्दै कोभिड–१९ का बिरामी आइरहेको पोखरा स्वास्थ्य विज्ञान प्रतिष्ठान आइपुग्ने गरेका छन् ।