३२ वर्षीया महिलालाई सामुहिक बलात्कार गरी फरार रहेका जुगल गाउँपालिका–४ का २० वर्षीय दिलिप सापकोटालाई ०७७ फागुण १९ गते चौतारा बजारबाट गिरफ्तार गरेकोे जिल्ला प्रहरी कार्यालयका इन्स्पेक्टर रामचन्द्र घिमिरेले बताउनुभयो ।
पीडितलाई ०७७ असोज १५ गते बेलुका जलबीरे अस्पतालमा परिवार नियोजनको तीन महिने सुई लगाएर फर्कदै गर्दा जुगल गाउँपालिका–४ मान्जे बजारमा बास बस्ने क्रममा चार जनाले सामुहिक बलात्कार गरेको पीडितको आरोप छ ।
घटनामा संलग्न आरोपितहरू मध्ये जुगल गाउँपालिका–४ मान्जे घर भएका २६ वर्षीय विकास सिल्वाल र सोही गाउँपालिका–५ ढाडेका २४ वर्षीय सुन्दर श्रेष्ठलाई ०७७ असोज २४ गते प्रहरीले घरबाट गिरफ्तार गरी अदालतमा पेश गरेको थियो ।
सोही ठाउँका २४ वर्षीय कैलाश नेपालीलाई ०७७ माघ २६ गते काठमाडौँबाट प्रहरीले गिरफ्तार गरेको थियो ।
पीडितले असोज १९ गते दिएको उजुरी असोज २० गते जिल्ला प्रहरी कार्यालयमा दर्ता भएको जिल्ला प्रहरी कार्यालयका डिएसपी प्रकाश सापकोटाले बताउनुभयो ।
पीडितको असोज १९ गते चौतारा अस्पतालमा स्वास्थ्य परीक्षण गराइएको थियो । पीडितलाई चौतारा स्थित महिला पुनस्थापना केन्द्रमा राखिएकोमा हाल पुनःस्थापना गरी घर पठाइएको छ ।