विष्णुपुर गाउँपालिका–१ स्थित जनता माध्यमिक विद्यालय खुरहुरियाका निमित्त प्रधानाध्यापक ३५ वर्षीय भुपेन्द्रकुमार साहलाई विद्यालय व्यवस्थापन समितिका ३१ वर्षीय अध्यक्ष चितरञ्जन यादव र ३० वर्षीय सदस्य सञ्जीवकुमार यादवले गालीगलौज, कुटपिट गरेको भन्दै जिल्ला प्रहरी कार्यालयले असोज ३० गते अभद्र व्यवहारको उजुरी दर्ता गरेको छ ।
विद्यालय परिसरमा असोज २९ गते आरोपितहरूले कुटपिट, गालीगलौज गरेको भन्दै निमित्त प्रधानाध्यापक साहले दिएको अभद्र व्यवहारको उजुरी दर्ता गरिएको जिल्ला प्रहरी कार्यालयका एसपी राजेन्द्रप्रसाद धमलाले बताउनु भयो ।
निमित्त प्रअ साहसहित शिक्षक ४५ वर्षीय रामनारायण यादव र लेखापाल ४५ वर्षीय रामलखन यादवमाथि दुव्र्यवहार गरेको र बचाउ गर्न आएका शिक्षकहरू भुवनेश्वरी साह र शिखा देवलाई पनि हातपात गरेको निमित्त प्रअ साहले आरोप लगाउनु भयो ।
प्रअ साहले राजविराजस्थित निजी विद्यालयहरूमा अध्ययनरत विद्यार्थीहरूलाई समेत मनोमानी ढङ्गले विपन्न लक्षित छात्रवृत्ति वितरण गरेको विषयमा विवाद हुँदा धक्काधुक्की भएको तर कुटपिट नगरिएको विद्यालय व्यवस्थापन समितिका अध्यक्ष यादवले बताउनु भयो ।
विद्यालयका प्रधानाध्यापक सुर्यनारायण यादवको गत भदौ ७ गते हृदयघातबाट निधन भएपछि साह निमित्त प्रधानाध्यापक हुनु भएको हो ।
छात्रवृत्ति वितरणको विषय बहाना मात्रै भएको बताउँदै निमित्त प्रअ साहले विष्णुपुर गाउँपालिका–१ खुरहुरीयामै घर भएका कटैया फत्तेपुर माविका प्रधानाध्यापक विरेन्द्रकुमार यादवलाई सरुवा गरेर ल्याउने योजनामा सहयोग नगर्दा कुटपिट र दुर्व्यवहार भएको दावी गर्नुभयो ।
घटनाप्रति घोर भत्र्सना गर्दै नेपाल शिक्षक महासङ्घ र सङ्घीय शिक्षक फोरम नेपालले असोज ३० गते र नेपाल राष्ट्रिय शिक्षक सङ्गठनले कात्तिक १ गते छुट्टा–छुट्टै विज्ञप्ति जारी गरी निमित्त प्रअ र शिक्षकहरूलाई गालीगलौज र कुटपिट गर्नेहरूलाई कारवाही गर्न माग गरेका छन् ।
विद्यालय व्यवस्थापन समितिकी सदस्य रेणुदेवी यादवले जिल्ला प्रहरी कार्यालयमा असोज ३० गते नै अपशब्द प्रयोग गरी दुव्र्यवहार गरेको आरोप लगाउँदै निमित्त प्रअ साह, शिक्षकहरू रामनारायण यादव, महेश यादव र लेखापाल रामलखन यादवविरूद्ध अभद्र व्यवहारको उजुरी दिनुभएको छ ।