नेत्रबिक्रम चन्द (विप्लव) नेतृत्वको प्रतिबन्धित नेपाल कम्युनिष्ट पार्टी निकट युवासंघ दाङका जिल्ला सदस्य तुलसीपुर उपमनपा–५ का २८ वर्षीय अर्जुन शाहीलाई प्रहरीले पुस २० गते गिरफ्तार गरेको जनाएको छ ।
शाही उपर प्रदेश सभा निर्वाचनका क्रममा ०७४ मङ्सिर १२ गते डिउटीमा रहेका तुलसीपुर उपमनपा– १२ का म्यादी प्रहरी विनोद चौधरीलाई बम विस्फोट गराई हत्या गरेको र एनसेल टावरमा आगजनी सम्बन्धि मुद्दा चलाउने तयारी भइरहेको जिल्ला प्रहरी कार्यालयका एसपी जनकप्रसाद भट्टराईले बताउनु भयो ।
आरोपितलाई शान्तिनगर गाउँपालिका– ४ भलानेटीमा क्यारेम बोर्ड खेल्दै गरेको अवस्थामा प्रहरीले गिरफ्तार गरेको थियो । शाहीको स्वास्थ्य परीक्षण पुस २० गते राप्ती स्वास्थ्य विज्ञान प्रतिष्ठानमा गरिएको प्रहरीले जनायो ।