उपनिर्वाचनका क्रममा निर्वाचन आचारसंहिता विपरीतका गतिविधिहरूको भएको भन्दै निर्वाचन आयोगमा २० ओटा उजुरीहरू दर्ता भएका छन् ।
निर्वाचनमा सहभागी दलहरूबाट उम्मेदवार र उनीहरूका समर्थकहरूले आचारसंहिताको अवज्ञा भएको भन्दै उजुरी दर्ता भएको र परेका उजुरीहरूमाथि छानविन चलिरहेको निर्वाचित आयोगले जनाएको छ ।
आयोगमा दर्ता भएका मध्ये १४ ओटा सामाजिक सञ्जालको प्रयोग गरी आचारसंहिता उल्लङ्घन भएको र बाँकी ६ ओटा हातपात, सरकारी साधन स्रोतको दुरूपयोग, पदीय मर्यादा विपरीत प्रचारप्रसारमा सहभागी भएको लगायतका उजुरीहरू रहेको प्रवक्ता राजकुमार श्रेष्ठले जानकारी दिए ।
उनले आचारसंहिता विपरीतका क्रियाकलाप भएको पाइए सम्बन्धित पक्षलाई कारबाहीको प्रक्रियाअघि बढाइने बताए ।
आयोगले उजुरीको प्रकृति हेरी छानबिन गरिरहेको समेत बताएको छ । यस्तै आयोगले उपनिर्वाचनका लागि अयोग्य ५ जना उम्मेदवारहरूको उम्मेदवारी पनि खारेज गरेको छ ।
यसअघिको निर्वाचनमा समानुपातिक सूचीबाट उम्मेदवार भई नाम सूचीबाट नहटाएका, सार्वजनिक पद धारण गरेका, सार्वजनिक मुद्दा खेपिरहेका उम्मेदवारहरूको उम्मेदवारी खोरेज गरिएको प्रवक्ता श्रेष्ठले बताए ।
उनले आयोगको नियम अनुसार उजुरीको छानबिन पुरा नभएसम्म कुन पक्षबाट आचारसंहिता अवज्ञा भयो भनेर खुलाउन नमिल्ने बताए ।