आफू एकल भएकै कारण घर निर्माण गर्न नसकेकी नीलकण्ठ नगरपालिका–२ की इन्द्रकुमारी मगर सरकारले भूकम्पबाट घर क्षति भएर निर्माण गर्न दिएको रकमले घर निर्माण गर्न नसक्ने अवस्थामा पुगेकी छिन् ।
एकल र वृद्ध अवस्था भएकोले उनले घर निर्माण गर्न नसकेपछि हालसम्म पनि पहिलो किस्ताको रकम समेत उनको खातामा गएको छैन ।
नीलकण्ठ नगरपालिका–१२ आँगेटारीका यमबहादुर थापामगरले गरिवीका कारण झुण्डिएर आत्महत्या गरेको प्रहरी अभिलेखमा छ ।
उनकी पत्नी लक्ष्मी थापा मगर हलचल गर्न नसक्ने अवस्थामा सुतिरहेकी छिन् । तीन जना सन्तान बाँसले बारेको टहरोमा बसिरहेका छन् ।
घर निर्माणका लागि पहिलो किस्ता झिकेको भएपनि सो रकम लक्ष्मी थापा मगरको उपचारमा खर्च भइसकेको छ ।
न उनीहरू घर बनाउन सक्छन् । न उनीहरूको बस्ने ठाउँ छ । जाडो महिनामा ओछ्यानमै शीत चुहिने अवस्थामा १२ वर्ष मुनिका तीन बालबालिका बस्न बाध्य छन् ।
उनीहरूमात्र होइन पुनः निर्माण प्राधिकरणले भूकम्पपछि गरेको तथ्याङ्क सङ्कलनको आधारमा धादिङ जिल्लामा १ हजार ८ सय २९ लाभग्राही जोखिमयुक्त अवस्थामा रहेका थिए ।
यसमध्ये घर निर्माण सुरू नै नगर्ने लाभग्राहीको सङ्ख्या ९८ रहेको पुनः निर्माण प्राधिकरण जिल्ला आयोजना कार्यान्वयन एकाई अनुदान व्यवस्थापन तथा स्थानीय पूर्वाधार आनन्दराज पाण्डेले बताए ।
जोखिमयुक्त लाभग्रहीमध्ये १ हजार १ सय ७४ ले मात्र सर निर्माण सम्पन्न गरेका छन् । घर निर्माण सुरू गरेर पनि ६ सय ५५ ले निर्माण सम्पन्न गर्न सकेका छैनन् ।
एकल महिला, ७५ वर्ष नाघेका मानिस, १४ वर्ष मुनिका मानिस र अपाङ्गता भएका मानिसहरूको घर जोखिमयुक्त लाभग्राही भनेर पुनःनिर्माण प्राधिकरणले परिभाषित गरेको छ ।
यसैगरी पुनः निर्माण प्राधिकरणले धादिङबाट ६ सय ८६ जना लाभग्रहीको नाम सूचीबाट हटाएको छ । लाभग्राही सूचीमा सूचीकृत भएर पनि सम्झौता नगर्ने र पहिलो किस्ता रकम नलिनेहरूको नाम हटाएको जिल्ला आयोजना कार्यान्वयन एकाई अनुदान व्यवस्थापन तथा स्थानीय पूर्वाधारका पाण्डेको भनाइ छ ।