१५ वर्षीया बालिकालाई अपहरण गरी शरीर बन्धक बनाई बलात्कार गरेको आरोपमा इलाका प्रहरी कार्यालय कञ्चनरुपले १६ वर्षीय एक बालकविरूद्ध असार २ गते उजुरी दर्ता गरेको छ ।
पीडित बालिकाको बयान र उजुरीपछि आरोपितलाई गिरफ्तार गरी उजुरी दर्ता गरिएको इलाका प्रहरी कार्यालय कञ्चनरुपका डिएसपी मकेन्द्रकुमार मिश्राले बताए ।
काठमाडौँमा मजदुरी गर्ने आरोपितले वैशाख १५ गते पीडितलाई अपहरण गरी काठमाडौँमा लगी बलात्कार गरेको पीडितको आरोप छ ।
पीडित बालिकाको स्वास्थ्य परीक्षण राजविराजस्थित गजेन्द्रनारायण सिंह अञ्चल अस्पतालमा असार १ गते गरिएको छ ।
आपसी सहमतिमा प्रेमिकालाई काठमाडौँ लगेको बताउँदै आरोपितले केटीका परिवारको दबाबमा पीडितले झुठो उजुरी गरेको बताए ।