राष्ट्रिय मानव अधिकार आयोगका सदस्य गोविन्द शर्मा पौड्यालले मानव अधिकारको कार्यान्वयनका लागि स्थानीय तहहरूको महत्वपुर्ण भूमिका रहेको बताएका छन् ।
रामपुरमा वैशाख ३० गते सम्पन्न स्थानीय तहमा विवाद समाधान र मानव अधिकार विषयक दुई दिने गोष्ठीको समापन कार्यक्रममा बोल्दै सदस्य पौड्यालले उक्त कुरा बताएका हुन् ।
पाल्पाका चार ओटा स्थानीय तह पूवखोला गाउँपालिका, रम्भा गाउँपालिका, निस्दी गाउँपालिका र रामपुर नगरपालिकालाई संयुक्त रूपमा हुने गरी रामपुरमा गोष्ठीको आयोजना गरिएको हो ।
गोष्ठीमा मानव अधिकारको परिचय, काम कर्तव्य अधिकार, मानव अधिकार, मानव अधिकार उल्लङ्घन र अपराध, स्थानीय तहको भूमिका, स्थानीय न्यायिक समितिबाट विवाद समाधान गर्दा ध्यान दिनुपर्ने कानुनी र कार्यविधिगत प्रकृया, पीडित र साक्षी संरक्षण, न्यायिक समिति, मानव अधिकारमुखी विकास पद्धति र स्थानीय तह, स्थानीय तहमा विवाद निरूपण र मेलमिलाप जस्ता विषयमा सहजीकरण गरिएको थियो ।