बिष्णुपुर गाउँपालिका–६ रञ्जितपुरकी ६० वर्षीया चनियादेवी राउतलाई कथित बोक्सीको आरोपमा अश्लिल गालीगलौज गरी कुटपिट गरेको भन्दै प्रहरीले राजगढ गाउँपालिका–३ का ५० वर्षीय धिरेन्द्र यादवलई चैत १५ गते गिरफ्तार गरेको छ । अर्का आरोपित र धिरेन्द्रकी ३० वर्षीया पत्नी कञ्चनदेवी यादव हालसम्म गिरफ्तार हुन नसकेको जिल्ला प्रहरी कार्यालयले जनाएको छ ।
पीडितलाई उनकै घरमा घरभाडाको विषयलाई लिएर भएको झगडामा माघ ५ गते आरोपितहरुले कथित बोक्सी भन्दै अमानवीय व्यवहार गरी कुटपिट गरेको भन्दै पीडितले जिल्ला प्रहरी कार्यालयमा फागुन १ गते उजुरी दिएकी थिइन् । आरोपितविरुद्धको उजुरी प्रहरीले चैत १७ गते दर्ता गरेको छ ।
आरोपित धिरेन्द्रकी जेठी पत्नीलाई कथित बोक्सीको टुनामुना लगाई मारेको भन्दै कुटपिट गरेको पीडितले आरोप लगाएकी छिन् ।
हात, पिठ्यूँमा चोट लागेका पीडितको उपचार तथा स्वास्थ्य जाँच राजविराजस्थित गजेन्द्रनारायण सिंह अस्पतालमा माघ ५ गते भएको छ ।