राजविराज नपा–१३ का स्थानीयवासीले तारपोल विस्तारका लागि दिएको उजुरी सो वडाका वडा अध्यक्ष राजेन्द्रप्रसाद यादवका छोरा ४५ वर्षीय सुरेन्द्र यादवले च्यातिदिएको विरोधमा वडावासीले माघ ७ गते वडा कार्यालयमा तालाबन्दी गरेका छन् ।
स्थानीय बासिन्दाले तारपोल विस्तारका लागि दिएको निवेदनमा माघ ७ गते वडा अध्यक्षले सिफारिश गरिरहेकै बेला उनका छोरा सुरेन्द्रले च्यातिदिएको विरोधमा वडा कार्यालयमा तालाबन्दी गरिएको स्थानीय सुकदेव यादवले बताए ।
नाराबाजी गर्दै स्थानीयवासीले वडा अध्यक्ष राजेन्द्रप्रसाद यादवलाई कार्यकक्षबाट बाहिर निकाली तालाबन्दी गरेका हुन् ।
गुनासोसहितको उजुरी लिएर माघ ८ गते राजविराज नगरपालिका कार्यालय आएका वडावासीले निवेदन च्यात्नेमाथि आवश्यक कारवाही गर्न माग गरेको नगरपालिकाकी उपप्रमुख साधना झाले बताइन् ।